Nga Vlora ku u takua me sipërmarrës e operatorë turistikë, Lulzim Basha ripërsëriti akuzat në adresë të kryeministrit Rama, duke e cilësuar si i vetmi përgjegjës për keqeverisjen. Basha tha se pas frikës së kryeministrit për një përballje me të fshihet bilanci negativ i katër viteve qeverisje.
Kryeministrin e akuzoi se edhe si deputet i Vlorës vjen me premtime të pambajtura, përpara votuesve që katër vite më parë i dhanë mandatin për të qeverisur vendin.
Vlonjatëve u premtoi se në planin e tij ekonomik ka vend për investime në turizëm e infrastrukturë. Basha premtoi gjithashtu se pas ardhjes në pushtet do të anulojë moratoriumin e gjuetisë.
Planin e tij ekonomik për taksa të ulëta, hapjen e vendeve te reja të punës dhe kreditimin e ekonomisë, të cilin e sheh të ngjashëm edhe me atë të Presidentit Trump, Basha e ndau edhe me banorë e tregtarë të Vlorës, si dhe sipërmarrës të një kompanie fasone në këtë qytet.
