Vijojnë sulmet mes dy partive, PS-LSI në koalicion por që në zgjedhjet e 25 qershorit synojnë të qeverisin të vetme.
Nga selia e LSI-së nënkryetari Luan Rama akuzoi kryeministrin Rama dhe politikat e tij si përgjegjëse për krijimin e sistemit që ai e quan të korruptuar dhe të kanabizuar.
“Sistemi i droguar dhe korruptuar sepse ishte Rama në krye të sistemit. Ne nuk kemi qenë në drejtimin e qeverisë, politikat qeverisëse janë politikat që sjell partia e forca më e madhe në qeverisjen e vendit. Prandaj kërkojmë të ndryshojë drejtimi” tha Luan Rama.
“Do i bëjmë nder të madh dhe do ta ndihmojmë që të mos jetë kryeministër” nënvizoi Luan Rama duke e akuzuar se ka mashtruar dhe se LSI për asnjë reformë nuk është bërë pengesë, madje e fton Ramën të ballafaqohet.
Luan Rama: “Marrëveshja PS-LSI Nuk ka qenë marrëveshje për tepsi, timon, as për koncesione e as për kanabizimin e vendit por ka qenë parimore. Ku e ka penguar LSI kryetarin e Rilindjes. Cfarë reforme ka ndërmarrë kreu i Rilindjes dhe LSI është bërë pengesë? Ku ka krijuar kosto LSI? Nuk lejuam tentativën e tij për të kapur sistemin përmes nëj reforme të deformuar. Ku janë shushunjat? Në cilin sektor të hipoketave janë shushunjat? Hipotekat janë drejtuar nga PS dhe tani u kujtua Rama?!
Hajde të ulemi ballë për ballë për të nxjerrë kush ka përgjegjësinë. LSI nuk i ik përgjegjësisë. Asnjë individ i LSI-së nuk e ka penguar të krijojë një administratë të denjë për BE , të tjerat janë hipokrizi. Më 25 qershor duhet ndarë Shqipëria e kanabizuar, e trafikut”.