Brenda pak orësh aleanca politike mes PS dhe LSI-së pritet të qartësohet dhe partitë të marrin një vendim se si do të dalin në zgjedhje.
Aleanca e majtë organizon paraditen e sotme takimin e parë zyrtar ku do të flitet për rikonfirmimin e koalicionit edhe për katër vitet e ardhshme. Takimi nuk do të jetë ‘tet a tet’ mes Ramës e Metës, por do të ketë dëshmitarë të shumtë.
Ky takim mes palëve pritet të mbahet në “Hotel Tirana”, dhe do të jenë përballë njëra-tjetrës vetëm Partia Socialiste dhe Lëvizja Socialiste për Integrim.
Dy kryetarët, Rama dhe Meta do të shoqërohen edhe nga dy pjesëtarë secili, por axhenda e takimit është ende e paqartë.
Duket se pas darkës së peshkut tek Pazari i Ri, Meta e ka humbur besimin tek Rama pasi tjetër gjë bisedohet në tryezë dhe më pas tjetër gjë bëhet publike dhe del në media, ashtu edhe si rasti i fundit që kishte nevrikosur dhe kreun e LSI-së.
E për këtë arsye edhe takimi i paradites së sotme do të ketë më shumë se 2 dëshmitarë, me qëllim që ajo që do të bisedohet dhe vendoset të mos transformohet në media.
