Ka hyrë në ditën e shtatë protesta e opozitës përballë Kryeministrisë në bulevardin “Dëshmorët e Kombit”.
Në fjalimin e mbajtur para qytetarëve kreu i opozitës Lulzim Basha zhvilloi bashkëbisedim me komunitetin e biznesit, nga ku tha se Rama u shpërndan pasurinë e shqiptarëve vetëm 4-5 njerëzve pranë tij.
“Investimet e huaja preferojnë çdo vend tjetër në Ballkan përveç Shqipërisë, sepse këtu është më e vështirë për të marrë një kredi apo të zgjerosh një biznes. Në Shqipëri ecin përpara vetëm 4-5 kodoshë biznesmenë që populli u thotë oligarkë, të cilët nga zyra e Edi Ramës marrin çdo ditë, thelat e mishit që është buka e gojës që u hiqet shqiptarëve. 4 ose 5 oligarkë thërret Edi Rama për çdo koncesion dhe pasuri kombëtare dhe së bashku ndajnë thelat e pushtetit dhe pasuritë e shqiptarëve, ndërkohë që vendi zhytet në mjerim. Çdo kush tjetër konsiderohet si armik”, tha Basha.