Nikoll Lesi-Ramës: Ke smirë për Metën e Bashën, por lutju Zotit që me kaq ta ketë inatin Trump

Shqipëria

Nikoll Lesi-Ramës: Ke smirë për Metën e Bashën, por lutju Zotit që me kaq ta ketë inatin Trump

Më: 17 janar 2017 Në ora: 18:53
Trump

Pas lajmit të Top Channel, se në ceremoninë e inagurimit të presidentit Donald Trump, nuk ka asnjë të zyrtar të ftuar nga Shqipëria, me përjashtim të ambasadores shqiptare në Uashington, Floreta Faber, Nikoll Lesi ka bërë një shkrim te “Koha Jonë”.

Sipas Lesit, ky është një lajm i fabrikuar nga Rama, për shkak të smirës dhe xhelozisë që ka.

“Që të jemi korrekt me të vertetën në raport me inatet, thashethemet, qejfmbetjet, kulisat për mospjesëmarrësit shqiptarë endërrues në ceremoninë e Inagurimit të Presidentit të SHBA Donald Trump duhet të themi se nga Shqipëria do marrin pjesë Kryetari i Parlamentit Ilir Meta, Lideri i Opozitës Lulzim Basha, Ministri Blendi Klosi dhe deputeti i PS-së, Ervin Bushati. Po kështu dhe ambasadorja e Shqipërisë në SHBA, Floreta Faber. Por sapo doli lajmi zyrtar për këtë delegacion nga Shqipëria filluan kulisat dhe qejfmbetjet politike në Tiranë se përse nuk janë futur në listën e ftesës së Trump.

Natyrisht që pjesëmarrja në një ngjarje të tillë është krenari e dinjitet, por duhet të jesh i ftuar pikësëpari, pasi në të kundërt nëse do të ishte siç shkruan një media se “ i kanë blerë biletat 500 dollarë për të marrë pjesë te ceremonia e Trump”, atëhere vetëm që merrte pjesë Edi Rama do kishte blerë 100 bileta! Apo ish-kryeministri Berisha mund të kishte blerë me shumë. Por protokolli presidencial i shtetit më të fuqishëm të botës, SHBA ka rregulla striktë në ftesa, pasi nuk është shfaqje apo koncert ku mund të paguash biletën dhe të futesh. Ka protokoll, siç ka natyrisht edhe lobe apo klane politike, të cilët ftojnë miqtë e tyre. Politika i njeh lobingjet, pasi janë rregulla të hapura në politikë, ku sejcili kongresmenë, senator, Departamenti i Shtetit si dhe stafi i Presidentit Trump fton miqtë e tij të besueshëm me të cilët do të mund të punojë në të ardhmen.

Nisur nga xhelozitë dhe smirat e politikanëve të caktuar në Tiranë, pse nuk është ftuar, nuk mund të arrihet deri në denigrim të Ceremonisë së Presidentit Amerikan Trump, ku mjafton të paguash një “biletë” apo diçka nën dorë dhe ftohesh apo futesh aty ku janë njërëzit me të fuqishëm të globit. Po të ishte kështu krejt deputetët biznesmenë apo kushdo që ka 5 mijë dollarë në Shqipëri dhe që e simpatizon Amerikën do të kishte blerë një biletë! Dhe Ceremonia do të mbushej me qindra shqiptarë!

Nuk është kështu dhe denigrimi deri në vulgaritet tregon smirë, porse edhe keqdashje ndaj miqve tanë amerikanë.

Natyrisht për të qenë realist në Ceremoni duhej të ishte ftuar edhe kryeministri Edi Rama. Pavarësisht se çka thënë ndaj Trump para zgjedhjeve. Ishte fushatë dhe fushata pranon edhe kundërvëniet deri në denigrim. Nuk kishte, fjala vjen, pse të ftohej ministri Klosi dhe deputeti Ervin Bushati para Edi Ramës. Nuk është se kemi gjë me Klosin dhe Bushatin, pasi janë politikanë korrekt, porse nga PS dhe Qeveria duhej Edi Rama. Por këtë nuk e vendosim ne në Tiranë. E kanë vendosur në SHBA, njërëzit e Donald Trump. Mundet që edhe Trump mban inat, sepse njeri është edhe ai. Të paftuarit të shpresojnë se, do Zoti, me kaq e ka inatin Presidenti Trump!

Nëse do kishte fituar Hillary Clinton natyrisht që Edi Rama do të ishte ndër të ftuarit e Ceremonisë dhe mediat e tij nuk do thonin se ” bleu 500 dollarë biletën”, pasi nuk kishte pse të ndodhte sepse ftesat nuk blihen. Ato jepen sipas preferencave të stafit të Trump dhe interesave amerikane”, thuhet në shkrimin e gazetës së Lesit.

Sot mund të lexoni Shfletoni kopertinat