Parlamenti hap procedurat për pranimin e kandidaturave për Avokatin e ri të Popullit. Siç e parashikon ligji, mandati i Avokatit të Popullit përfundon në dhjetor 2016. Me anë të një njoftimi, Parlamenti fton të interesuarit të paraqesin kandidaturën e tyre.
Një ndër kushtet për të kandiduar në këtë post është mospërfshirja në parti apo organizata politike.
Aktualisht, postin e Avokatit të Popullit e mban Igli Totozani, i cili është zgjedhur nga Parlamenti seancën e fundit të dhjetorit në vitin 2011.
Njoftimi i Kuvendit
Ftohet çdo shtetas shqiptar, i cili plotëson kushtet e parashikuara në nenin 3, të ligjit nr.8454 datë 04.02.1999, “Për Avokatin e Popullit” i ndryshuar, të paraqesë kandidaturën për Avokat të Popullit të Republikës së Shqipërisë:
Kushtet për t’u zgjedhur Avokat i Popullit
Avokat i Popullit mund të jetë çdo person që plotëson këto kushte:
a): të jetë shtetas shqiptar.
b): të ketë njohuri dhe veprimtari të shquara në fushën e lirive dhe të drejtave të njeriut dhe të ligjit;
c): të shquhet për aftësi profesionale dhe figure të pastër etiko-morale;
ç): të mos jetë dënuar penalisht
d): të mos jetë deputet në legjislaturën e Kuvendit që bën propozimin a zgjedhjen e tij.
Kandidatët duhet të paraqesin dokumentet zyrtarisht pranë sekretarisë së Kuvendit të Shqipërisë. Dokumentet duhet të përmbajnë:
Kërkesë për shprehje interesi për të kandiduar për vendin vakant të shpallur
CV-në, nr kontakti tel/email/
Fotokopje e kartës së identitetit
Librezë pune e noterizuar
Diplomë që provon se ka mbaruar arsimin e lartë universitar / studime pas universitare/ të noterizuara
Vërtetim të gjendjes gjyqësore që nuk ka qenë i dënuar penalisht.
Plotësim dhe nënshkrimi i formularit vetëdeklarimi, sipas përcaktimeve të ligjit nr 138/2015 “Për Garantimin e Integritetit të Personave që Zgjidhen, Emërohen ose Ushtrojnë Funksione Publike”.
Deklaratë që kandidati nuk është anëtar i partive politike.
Deklaratë që kandidati nuk është në konflikt interesi.