Qyteti i Sarandës në jug të vendit i konsideruar dhe njohur tashmë si perla e turizmit në Shqipëri, ka njohur këtë vit një rritje të lartë të numrit të vizitorëve.
Sipas ekspertëve të fushës, e veçanta e këtij sezoni ishte fluksi i lartë i turistëve italianë, krahas atyre tradicional nga vendet lindore.
Infrastruktura e restauruar, shëtitorja e qytetit me restorantet, hotelet dhe tregun e suvenireve reflekton menjëherë se qyteti gjendet në kulmin e sezonit turistik.
Bashkia e qytetit njofton se numri i vizitorëve italianë ka qenë një surprizë e sezonit. Shumë prej tyre kanë zgjedhur të vijnë pa ndërmjetësimin e agjencive turistike. Megjithatë, koha e qëndrimit vijon të mbetet e shkurtër dhe shpenzimet, modeste.
Saranda ka një kapacitet akomodues hotelier prej 5700 vendesh dhe për gushtin ishte prenotuar tërësisht.
