Një incident është shënuar gjatë prezantimit të projektit të stadiumit të ri.
Disa përfaqësues të shoqërisë civile dhe gazetarë nuk janë lejuar nga rojet e Gardës të hyjnë në sallën e mbledhjes së Këshillit Kombëtar të Territorit, ku kryeministri Rama prezantoi sot pas mesditës projektin e stadiumit të ri.
Incidenti ndodhi pak pasi kryeministri Edi Rama kishte nisur të fliste në mbledhje.
Mes personave të cilët nuk u lejuan të merrnin pjesë në prezantimin e projektit ishin edhe gazetarët Fatos Lubonja, Andi Bushati, Ylli Rakipi dhe kryetari i Forumit për Trashëgiminë Kulturore, Gjergj Bojaxhi.
Aktivistët e shoqërisë civile janë grumbulluar para ndërtesës ku po mbahet takimi prezantues.
Debati me punonjësin e Gardës
Lubonja: Na u tha për dëgjesë publike. Erdhëm, na lini to të hyjmë të dëgjojmë...
Gardisti: Ju nuk keni asnjë lloj të drejte të hyni brenda në sallë...
Lubonja: Është pronë private? Po nuk po e marrim vesh në çfarë shteti po jetojmë...
Gardisti: Unë jam në shërbim...
Lubonja: Po kryeministri është lejuar të hyjë?
Gardisti: Ju lutem, është pronë private, unë jam në shërbim, mos më protestoni këtu.
Bojaxhi: Nuk kemi ardhur për të protestuar. Kemi ardhur për të dëgjuar këtu, në mos gaboj brenda ka dëgjesë publike
