Partia Socialiste i kërkoi sot organeve të prokurorisë të nisin hetimet ndaj ish- kreut të bashkisë Tiranë, Lulzim Basha, për shpërdorim detyre.
Denoncimi për të cilin kërkohet të hetohet, u bë nga deputeti socialist, Taulant Balla, në një dalje publike për mediat nga selia rozë.
Sipas Ballës, shkelja e konsumuar nga Basha, konsiston në rinovim të lejes së ndërtimit për një godinë 16 katëshe në qendër të kryeqytetit.
Ish-kryetari i bashkisë Tiranë, Lulzim Basha, vetëm gjashtë ditë para se të linte detyrën pas humbjes në zgjedhjet e kaluara lokale, ka firmosur rinovimin e lejes së ndërtimit të një godine 16-katëshe në qendër të Tiranës, në truallin e një përfaqësie diplomatike, duke mos respektuar asnjë rregull urbanistik, duke rrezikuar ndërtesat përreth dhe duke mos plotësuar asnjë rregull teknik”, bëri të ditur Balla.
Ai e quajti këtë veprim të ish- kryebashkiakut si tradhëtinë e fundit që i bëri qytetit që e drejtoi për katër vite. Balla kujtoi gjithashtu se Basha, sot lider i Partisë Demokratike, në cilësinë e ministrit të Rendit vrau katër protestues, si ministër i Transporteve vodhi 230 milionë euro nga rruga e Kombit dhe si ministër i Jashtëm fali detin e Shqipërisë.
Si i tillë, tha ai, Lulzim Basha nuk mund të jetë ai që u ofron një të ardhme të mirë shqiptarëve.