12 persona të familjes Qato në Skrapar kanë mbetur të pastrehë, pasi shkarkesa e një ngarkese elektrike gjatë mbrëmjes së të mërkurës ka djegur banesën e tyre.
Mësohet se, gjatë stuhisë dhe reshjeve të një nate më parë në këtë zonë, një shkarkesë elektrike ka goditur rrjetin elektrik të banesës në fshatin Novaj.
Në momentin e shpërthimit të zjarrit të gjithë pjesëtarët e familjes kanë qenë brenda, dhe ka qenë e pamundur shpëtimi i orendive.
Zjarri që përfshiu të gjithë banesën ku jetonin dy familje, shkatërroi gjithçka. Ndërkohë, të 12 banorët e mbetur të pastrehë kërkojnë ndihmën e bashkisë për t’u strehuar përkohësisht.
