“Shqipëria i konsideron Shtetet e Bashkuara një mik të vyer dhe një partner strategjik për interesat e saj kombëtare dhe në saje të ndihmesës dhe mbështetjes shumëvjeçare e të pandërprerë amerikane si dhe të vendeve të tjera partnere Shqipëria është sot anëtare krenare dhe e denjë e NATO-s dhe një vend kandidat me meritë për në Bashkimin Evropian.
Ne jemi pamasë mirënjohës për mbështetjen e vazhdueshme e të pandërprerë dhënë nga qeveritë dhe populli amerikan, duke qenë të ndërgjegjshëm se pa këtë ndihmë të çmuar, Shqipëria nuk do të kishte arritur përparimin e deritanishëm”.
Kështu u shpreh Presidenti Bujar Nishani në fjalën përshëndetëse të mbajtur në Pallatin e Brigadave ku organizoi një veprimtari festive me rastin e Ditës së Falënderimeve. Në prani të Ambasadorit Donald Lu, qytetarëve amerikanë që jetojnë dhe punojnë në vendin tonë, miq e të ftuar shqiptarë mes të cilëve edhe mjaft ish-të përndjekur politikë, Nishani theksoi se Shqipëria ka qenë që në fillim pjesë e koalicionit kundër terrorizmit ndërkombëtar dhe forcat tona ushtarake kanë shkëlqyer dhe janë dalluar kudo ku kanë shërbyer në misionet paqeruajtëse krah për krah me sivëllezërit e tyre amerikanë.
“Aq më shumë rëndësi ka kjo festë në ditët e sotme, kur vlerat e kulluara të njerëzimit janë seriozisht të kërcënuara e të sulmuara nga aktet barbare dhe terroriste, që kanë goditur popuj dhe vende të ndryshme vetëm e vetëm se ata i luten dhe i falen Zotit tonë të përbashkët në gjuhë dhe mënyrë të ndryshme”, theksoi Presidenti.
Kreu i Shtetit vuri në dukje se kjo festë na shërben edhe për t’u shkundur nga mospërfillja e përditshme dhe për t’u kujtuar se në botë, në Amerikë, në Shqipëri, në çdo cep të rruzullit ka edhe njerëz me më pak fat se ne: të sëmurë, të vuajtur, të varfër, të pamundur, të braktisur, të përndjekur, të uritur e pothuajse të harruar në mjerimin, të cilët kanë nevojë për dorën e ngrohtë dhe përkujdesjen e gjithsecilit prej nesh.
Ndërsa Ambasadori i Shteteve të Bashkuara në Tiranë, Donald Lu, në përshëndetjen e tij vuri në dukje mes të tjerash se: “Ne jemi mirënjohës për mikpritjen e ngrohtë të Presidentit Nishani dhe Zonjës së Parë si dhe për miqësinë e sinqertë të ofruar nga popullit shqiptar. Le të shërbejë kjo Ditë Falënderimesh për të na kujtuar të gjithëve se sa shumë gjëra kemi për t’u shprehur mirënjohjen tonë!”