“Na vrau deputeti i zonës Armando Prenga”, tha në një lidhje telefonike për televizionin ABCNews i plagosuri Gjergji Cali. Ai sqaroi rrethanat e ngjarjes, ndërsa konfirmoi se ishte jashtë rrezikut për jetën.
Shtatë persona mbeten të plagosur pas një sherri mes familjes së deputetit Armando Prenga dhe familjes Cali në qytetin e Laçit. Mësohet nga burime ende te pakonfirmuara së në orët e mbrëmjës vëllai i deputetit Prenga, Valentin Prenga, së bashku me disa të afërm, kanë shkuar tek lokali i një prej të afërmve të familjes Cali në Patok dhe aty janë konfliktuar verbalisht mes tyre.
Burime për ABCNews bëjnë me dije se me pas një anëtar i familjës Cali, i përfshirë në sherr, është nisur për tek komisariati për të bërë denoncim për familjen Prenga dhe aty është ndeshur me këta të fundit, të cilët i kanë kërkuar që të mos bëjë denoncim në komisariatin e Laçit.
Më pas sherri ka degraduar edhe në përdorimin e armëve dhe sendeve të forta nga ku konfirmohet zyrtarisht se 7 persona kanë mbetur të plagosur, mes tyre edhe vëllai i deputetit Armando Prenga.
Sipas News24, deputeti i PS mund të akuzohet për kanosje serioze, plagosje me dashje dhe armëmbajtje pa leje.
Ndërkohë ish-kryeministri Sali Berisha shkruan se në Policinë e Tiranës, Prenga po ushëzohet që të deklarojë se ka vepruar në kushtet e vetëmbrojtjes, për të shpëtuar nga drejtësia.
Nga ana tjetër, policia ka vënë në dijeni prokurorinë për arrestimin e deputetit Armando Prenga, ndërkohë që pritet që kryeprokuori të vërë në dijeni menjëherë kreun e Kuvendit.
Sipas Kushtetutës, deputeti mund të ndalohet ose arrestohet pa autorizimin e Kuvendit kur kapet në kryerje e sipër ose menjëherë pas kryerjes së një krimi.
Në këto raste, Prokurori i Përgjithshëm njofton menjëherë Kuvendin, i cili kur konstaton se nuk ka vend për procedim, vendos për heqjen e masës.
Neni 119 i Rregullores së Kuvendit shtjellon më tej nenin kushtetues, kur pas njoftimit të menjëhershëm nga kryeprokurori, kryetari i Kuvendit thërret menjëherë Këshillin e Rregullores dhe kërkon shqyrtimin e çështjes.
Brenda dy ditëve këshilli shqyrton nëse ka vend për procedim, duke dëgjuar Prokurorin e Përgjitshëm dhe deputetin e ndaluar ose të arrestuar.
Këshilli paraqet raportin për seancën plenare, e cila thirret brenda dy ditësh nga kryeparlamentari.
Me votim të fshehtë, seanca vendos heqjen ose mosheqjen e masës së ndalimit ose të arrestimit të deputetit.