Aksioni kundër informalitetit ka nisur paralelisht në të gjitha qytetet e vendit. Drejtoresha e Përgjithshme e Tatimeve, Briseida Shehaj, ka udhëtuar paraditen e sotme drejt Shkodrës, ku ka zhvilluar një takim me inspektorët e Autoritetit Kombëtar të Ushqimit, Higjienës dhe atij të Punës.
Shehaj u ka kërkuar strukturave që do të kryejnë kontrollet në terren tolerancë zero ndaj rasteve në shkelje të ligjit.
Sipas udhëzimeve të dhëna, puna në terren do të nisë në orën 08:00 dhe do të mbyllet në orën 20:00. Shehaj ka kërkuar nga inspektorët që të mos neglizhojnë raste të bizneseve të paregjistruara, punëtorëve të padeklaruar, mungesës së kasës fiskale apo moslëshimit të kuponëve tatimorë si dhe u ka kujtuar atyre se në rast të abuzimit me detyrën do të përballen me forcën e ligjit.