Askush nuk do t’i gëzojë pronat e vjedhura. Paralajmërimi është bërë nga Kryeministri Edi Rama gjatë një takimi të zhvilluar me institucionet ligjzbatuese, ndërsa theksoi se çështjes së pronës do ti bëhet operacion i thellë duke e shëruar që në qelizë.
"Jemi këtu për të çelur një fazë të dytë të kësaj marrëveshje që kërkon një angazhim të përditshëm për tu hedhur në kundërsulm ndaj grabitësve të pronës. Ky mbetet një detyrim madhor i Shqipërisë, për të qenë një demokraci funksionale dhe një shtet i së drejtës dhe ky është dhe një detyrim i yni. Shqipëria nuk mund të jetë vendi që gjenerata tjetër të trashëgojë një vend ku grabitësit dhe fallsifikatorët ta trashëgojnë e gëzojnë atë. Është një rrugë e gjatë për t’ia dalë, por është një gadishmëri dhe përgjegjësi. Asnjë projekt zhvillimi nuk mund të na japë rezultatin që meritojmë nëse zhvillimi i ekonomisë është një hapësirë e shkëputur nga zhvillimi normal i pronës. Është një fenomen kanceroz që ka prekur dhe zhvilluar në qelizë të gjithë problemin me pronën dhe që bie ndesh me interesat pasurore të shqiptarëve dhe pronarëve të vërtetë.
Gjatë periudhës së parë të qeverisjes jemi njohur me fakte të tmerrshme se si dhjetra e dhjetra hektarë tokë janë vjedhur duke përdorur dokumenta të fallsifikuar”, tha Kreu i Qeverisë.
Sipas tij, procesi i tejzgjatur i kthimit dhe kompensimit dhe vendimarrja në këto vite kanë krijuar kushtet për zgjidhjen e këtij kanceri në të gjithë vendin tonë.
“Ana tjetër e medalies është çelja e kësaj faze të dytë, nëpërjet një operacioni të thellë e goditjes të ç'do akti të falsifikuar që ka goditur një të drejtë tërësisht të falsifikuar mbi pronën. Dhënia fund e të gjithë kësaj historie përmes procedurave ligjore dhe transparente ka si produkt goditjen e të gjithë rasteve të vjedhjes së pronave", tha Rama .
Sipas tij, lufta për mbrojtjen e pronës nuk është vetëm një luftë me grabitësit, por dhe me gjykatësit që janë bërë palë me ta.
“Po të ishte kjo luftë vetëm me grabitësit, do të ishte më e thjeshtë. Por kjo është një luftë edhe me gjykatësit, sepse janë palë. Gjykatës të cilët fshihen pas vendimeve kolegjiale dhe që në këto kushte aktualisht janë të pakundërshtueshëm. Vetëm aktualisht ama. Sepse reforma në drejtësi do të krijojë kushte të reja për të ndarë shapin nga sheqeri dhe për të ndarë në mënyrë ligjore dhe profesionale kush e meriton të mbajë togën e gjykatësit dhe kush nuk e meriton atë”, theksoi Kryeministri.
