Nën kujdesin e kancelarit austriak Faymann dhe kancelares gjermane, Merkel, nisi në Vjenë samiti i dytë i vendeve ballkanike, ku në fokus do të jenë zhvillimet infrastrukturës në rajon, përfshi ato me karakter politik dhe të luftës kundër ekstremizmit, si dhe ato të emigracionit.
Samiti ka nisur në Ministrinë e Punëve të Jashtme të Austrisë, ku të gjithë ministrat e Jashtëm nga vendet e Ballkanit Perëndimor, si temë diskutimi kishin “mosmarrëveshjet bilaterale në Ballkanin Perëndimor drejt rrugës së anëtarësimit”.
Në një intervistë nga Vjena, ministri i Punëve të Jashtme, Ditmir Bushati ka dhënë detajet se çfarë është biseduar në këtë panel të parë të drejtuar nga homologu austriak, Sebastian Kurz.
“Një ndër temat që u la si detyrë do të ishte dhe shqyrtimi i një mekanizmi lehtësues përsa u përket çështjeve të hapura, mosmarrëveshjeve të vendeve të Ballkanit Perëndimor, mosmarrëveshjeve ekzistuese mes vendeve anëtare të BE-së dhe vendeve të Ballkanit Perëndimor, që kanë rezultuar një pengesë sa i përket procesit të integrimit europian dhe mbi të gjitha sa i përket transformimit të rajonit”, – deklaroi ministri Bushati.
Kreu i diplomacisë shqiptare thotë se vendet kanë arritur një marrëveshje për të mos penguar njëra-tjetrën në procesin e integrimit dhe vitin e ardhshëm, gjatë samitit që do të zhvillohet në Paris, do të paraqitet një raport progresi mbi tejkalimin e mosmarrëveshjeve mes vendeve të Ballkanit Perëndimor.
Dita e dytë e samitit, mesditën e së enjtes, do të nisë me diskutimet për ndërtimin e autostradës Nish-Prishtinë-Durrës, ku në panel do të jenë kryeministri Rama, ai serb Vuçiç, komisioneri i Bankës Europiane të Investimeve, Hoyer, komisioneri Hahn dhe presidenti Bankës Europiane për Rindërtim dhe Zhvillim, Chakrabati.
“Në nivel kryeministrash do të miratohet harta e ndërlidhjes së rajonit, zgjerimi i rrjeteve kryesore të infrastrukturës së BE-së edhe në vendet e Ballkanit, një lidhje më të integruar të ekonomive, një deklaratë e përbashkët për bashkëpunim në fushën rinore, një nismë shqiptaro-serbe me sekretariat në Tiranë dhe Beograd, si dhe do të vendosen piketat për mënyrën sesi do të zbatohen projektet infrastrukturore, duke i paraprirë samitit të ardhshëm”, – thotë Bushati. Samiti i ardhshëm i vendeve të rajonit do të zhvillohet pas një viti në Paris, ku pritet të mbizotërojë çështja e energjisë.
