Katër pllakat prej bronzi të vjedhura nga Monumenti i Pavarësisë që ndodhet në afërsi të qendrës së kryeqytetit, janë dorëzuar sot në polici.
Mësohet se pllakat janë dorëzuar në Policinë Bashkiake. Ditën e djeshme Bashkia e Tiranës nisi punën për kthimin e identitetit të monumentit që ishte degraduar në një banjo publike.
Punonjësit do të rregullojnë pjesët e dëmtuara dhe do të fshijnë mbishkrimet në faqet e monumentit, brenda disa ditësh. Ata do të punojnë për të rregulluar pjesët e amortizuara, dhe restaurimi do të zgjasë disa ditë.
Jo më larg se dje, kryebashkiaku Erion Veliaj paralajmëroi të gjithë ata që vandalizojnë monumentet, se do të ketë procedime penale.