Ardian Fullani u paraqit pasditen e djeshme në Prokurorinë e Tiranës, ku u njoh me akuzën e shpërdorimit të detyrës në të paktën tri raste. Vjedhja e 713 milionë lekëve në Bankën e Shqipërisë, blerja e Hotel ‘Dajtit’ dhe rikonstruksioni i selisë qendrore të Bankës së Shqipërisë, sipas prokurorisë janë shkeljet e kryera nga ish-guvernatori.
Një vit nga nisja e hetimeve për skandalin e Bankës së Shqipërisë, ish-guvernatori Ardian Fullani merret zyrtarisht i pandehur për akuzën e “shpërdorimit të detyrës”.
I shoqëruar nga avokati i tij, Fullani është paraqitur pasditen e djeshme në Prokurorinë e Tiranës, ku nuk qëndroi më shumë se 10 minuta. Ai u njoh me akuzën e ngritur nga prokuroria dhe pasi e firmosi atë, u largua nga ambientet e Prokurorisë së Tiranës pa bërë komente për mediat.
Burime nga organi i akuzës bëjnë të ditur se Fullani është larguar duke mos dhënë asnjë deklarim përpara prokurorëve lidhur me akuzat e ngritura ndaj tij. Sipas burimeve mësohet se ndaj ish-guvernatorit të Bankës së Shqipërisë, Ardian Fullani, është ngritur akuza e “shpërdorimit të detyrës me pasojë dëme të konsiderueshme financiare”.
Akuza e prokurorisë u referohet tri çështjeve të ndryshme të hetuara për rreth një vit. Rasti i parë për të cilin nisën dhe hetimet ka të bëjë me vjedhjen e 713 milionë lekëve nga Thesari i Bankës së Shqipërisë, ngjarje e cila u zbulua në korrik të vitit të shkuar.
Për këtë vjedhje prokuroria urdhëroi arrestimin e 19 personave, mes të cilëve guvernatori Fullani dhe inspektorja e Përgjithshme, Elivar Golemi. Por ndryshe nga të arrestuarit e tjerë, ish-guvernatori arriti të rifitojë shpejt lirinë, pasi Gjykata e Apelit caktoi masën e sigurisë “arrest shtëpie” dhe Gjykata e Lartë caktoi “detyrim për paraqitje”.
Madje në vendim, gjykata ka marrë përsipër edhe shqyrtimin e themelit të çështjes, pasi ndër të tjera thotë se veprimet e ish-guvernatorit nuk kanë sjellë pasojë në vjedhjen e ndodhur në Thesarin e Bankës së Shqipërisë.
Por nga hetimi i prokurorisë rezulton se, pavarësisht propozimeve të Këshillit Mbikëqyrës, guvernatori nuk kishte zgjedhur zv.guvernatorin e dytë, i cili sipas ligjit kishte si detyrë të hartonte politikat e sigurisë në Bankën Qendrore.
Ky post ka mbetur vakant për vite me radhë dhe prokuroria ngarkon me përgjegjësi ish-guvernatorin Fullani, i cili sipas akuzës ka shpërdoruar detyrën. Por në listën e akuzave të ngritura nga prokuroria nuk mungon as shitja e shumëdebatuar e Hotel ‘Dajtit’, të cilin Banka e Shqipërisë e bleu nga qeveria në shumën e 30 milionë eurove.
Procedura e ndjekur për këtë blerje dhe ajo që ndodhi më pas me Hotel ‘Dajtin’, sipas prokurorisë konsiderohet si shkelje ligjore, për të cilën duhet të mbajë përgjegjësi ish-guvernatori, i cili ka miratuar transaksionin.
Ndërsa çështja e tretë për të cilën prokuroria thotë se ish-guvernatori ka përgjegjësi ligjore, ka të bëjë me rikonstruksionin e selisë qendrore të Bankës së Shqipërisë.
Ky proces ka zgjatur rreth një vit e gjysmë më tepër nga sa ishte parashikuar në kontratë, çka ka sjellë pasoja ekonomike edhe për faktin se gjatë kësaj kohe Banka e Shqipërisë e ushtronte veprimtarinë e saj në ambiente të marra me qira.
Vlera e qirasë së paguar për një periudhë prej rreth dy vitesh, sipas akuzës është shumë më e lartë se çmimi i tregut të qirave për zonën ku ishte vendosur përkohësisht një pjesë e stafit të Bankës së Shqipërisë.
Për të gjitha këto akuza, ish-guvernatori do të përballet në Gjykatën e Tiranës, ku brenda kësaj jave pritet të depozitohet dosja penale e prokurorisë.
Gjykimi i ish-guvernatorit do të kryhet veçmas nga autorët e tjerë të përfshirë ose të dyshuar si të përfshirë në skemën e vjedhjes së 713 milionë lekëve.
Hetimet janë mbyllur një vit pas shpërthimit të skandalit të vjedhjes së Thesarit të Shtetit, ku autori kryesor është Ardian Bitraj, i dënuar në muajin maj me 20 vite burg nga gjykata, nga të cilët do të vuajë 13, për shkak të gjykimit të shkurtuar që kishte kërkuar më herët.