Dy ditë pas mbrojtjes që i bëri kryeministri Edi Rama draftit të Ligjit të ri për Arsimin e Lartë, drejtues të Universitetit të Tiranës dhe Këshilli Studentor u shprehën kundër disa kapitujve të tij, veçanërisht atij për financimin, ku universitetet private dhe ato publike trajtohen në mënyrë të barabartë.
Rektori Dhori Kule u shpreh ky ligj është antikushtetues, pasi Kushtetuta u jep universiteteve autonomi dhe jo pavarësi.
“Nëse do bëhet pjesë e ligjit ky lloj institucioni, që e ka eminent riskun për ta kthyer të mirën publike në private, atëherë arsimi i lartë do ketë pasoja shumë të mëdha” deklaroi rektori Dhori Kule.
Rektori i Universitetit të Tiranës kundërshtoi dhe transferimet e studimeve brenda të njëjtit cikël në fusha studimi të njëjta ose të përafërta brenda dhe jashtë një institucioni arsimor. Universiteti i Tiranës, shfaqi rezerva edhe për kapitullin e autonomisë ku agjencitë e krijuara nga qeveria marrin kompetenca të mëdha në kontrollin e universitetit.
Ndërsa profesorët theksuan se me buxhetin e shtetit nuk arrihet që të paguhen as stafet akademike, pagat e të cilëve janë më të ulëta se kolegët e tyre në Kosovë.
Dekani i Fakultetit Histori-Filologji, Shezai Rrokaj tha se “sikurse më parë, edhe qeverisja aktuale nuk përmbush dot as sistemin e pagave në universitete dhe universitetet prej 3-4 vitesh marrin nga fondet e kushtëzuara për të plotësuar nevojën e pagave. Nëse edhe në këtë pak fond që jepet nga shteti futen aktorë të tjerë, atëherë ne ngremë kështjella të bukura, por kështjella prej rëre sepse janë jashtë realitetit”.
