Deputeti socialist, Erion Braçe nuk e ka kompleks gjatësinë, madje i mjaftojnë centimetrat e tij. Nëpërmjet një reagimi në "Facebook", ai kërkon që gazetat të mos merren me gjatësinë e tij, pasi ajo nuk e pengon të punojë. Duke përgënjeshtruar lajmin se kishte hipur mbi karrige për të festuar, Braçe kërkon që të verifikohen ato që shkruhen. Bëhet fjalë për fotot e deputetit socialist, gjatë festimeve për fitoren e Fredi Kokoneshit në Divjakë.
“Nuk jam mbi karrige, jam mbi tavolinë!! Nuk jam në festën e fitores, jam në zyrën elektorale!! Është fiks data 22 Qershor dhe ora 14.00; Menjeherë pas proceverbalit të fundit dhe kur fitorja u garantua. Hipa sipër tavolinë për t’i parë të gjithë sy më sy, nga tavolina ime deri në metrin e fundit të 12 metrave zyrë e ngushtë, i përulur dhe tërësisht mirënjohës ndaj tyre. Ju fola të gjithëve, sepse ashtu e ndieja, ju thashë qartë. Fitore me vota puro socialistësh, fitore zemre e pasioni. Ndaj mos u merrni fare me gjatësinë time, as që e kam kompleks. Më mjaftojnë 165 centimetra dhe kaq janë plot për të folur, punuar dhe fituar. Natyrisht, edhe për të ngrënë, pirë dhe... vrapuar ”, shkruan Braçe.
