Kandidati i pavarur për bashkinë e Tiranës Gjergj Bojaxhiu u është kundërpërgjigjur deklaratave të Erion Veliaj, i cili pak më herët u shpreh se kandidatët e pavarur kanë dalë nga SHQUP-i.
Bojaxhiu theksoi se kandidimi i tij për bashkinë e kryeqytetit është shprehje e vullnetit të 14 mijë qytetarëve dhe se deklaratat e Veliajt janë një fyerje për këta qytetarë, “të cilët Veliaj i konsideron me sa duket ose budallenj të mashtruar prej meje, ose si “të Saliut”.
Në përgjigje ndaj akuzave të Veliajt, Bojaxhiu i shtroi atij gjashtë pyetjeve për të cilat qytetarët janë të interesuar:
A do e anulojë Zoti Veliaj vendimin Rama-Berisha-Basha për kthimin në tokë ndërtimi të rreth 70 hektarëve sipërfaqe përgjatë kurorës së Parkut të Liqenit?
Unë do ta anuloj këtë vendim me referendum të qytetarëve të Tiranës.
A do e lejojë Zoti Veliaj ndërtimin 15-katësh në pjesën e parkut përballë Fakultetit Ekonomik, i cili është në tavolinën e Kryetarit të Bashkisë për firmë?
A do t'i lejojë Zoti Veliaj ndërtimet masive të planifikuara në pjesën e parkut në krah të Korpusit të Universitetit, mbi Akademinë e Arteve?
A do t'i lejojë Zoti Veliaj ndërtimet e planifikuara në territorin ku është sot Garda?
A do t’i lejojë Zoti Veliaj ndërtimet në trekëndëshin, që sot është parkim, në fillim të digës së liqenit?
A do t’i lejojë Zoti Veliaj ndërtimet që kanë filluar dhe të tjera që po përgatiten të fillojnë poshtë Digës së Liqenit?
