Vetëm dy muaj para se të lejë postin e kryebashkiakut, Lulzim Basha po përfundon projektet e lëna përgjysmë në 4 vite të mandatit të tij, me motivin e bllokimit nga qeveria. Kryedemokrati Basha përuroi sot punimet në lulishten pranë parkut të autobusëve në Tiranë, që sipas tij nuk duhet të ishte përfunduar, pasi projekti ishte bllokuar.
Basha e cilësoi një projekt të rëndësishëm të mandatit të tij, të cilin arriti ta përfundonte vetëm dy muaj pas zgjedhjeve të ardhshme lokale.
“Nuk ishte as e para dhe as e fundit lagje që vazhdonte kështu prej më shumë se disa dekadash. Por ishte njëkohësisht edhe sfida jonë. Sot kemi rikthyer hapësirën e gjelbër ashtu siç duhet. Kryeministri befasohet sot nga ajo që sheh se ka menduar që e ka bllokuar çdo projekt të Bashkisë së Tiranës”, tha Basha.
Basha nuk la mënjanë as akuzat ndaj ish-kreut të Bashkisë, Edi Ramës, ndërkohë që theksoi se Tirana do të vazhdojë të drejtohet nga të djathtët pas 21 qershorit.