Në deklaratën e bërë ditën e sotme deputeti Tom Doshi, u shpreh se Ilir Meta ka urdhëruar jo vetëm vrasjen e tij, por edhe të kolegut të tij demokrat Mëhill Fufi. Deputeti demokrat, që marrjes së mandatit ka qenë në hije gjatë gjithë kësaj kohe por që deklarata e Doshit e rikthue në vëmendje edhe një herë.
Por kush është Mëhill Fufi?
Deputeti i Partisë Demokratike për qarkun e Lezhës, u bë i njohur në zgjedhjet e 23 qershorit të vitit 2013, pas një konflikti të tij verbal me militantin e Lëvizjes Socialiste për Integrim Gjon Gjoni, ku Fufi e akuzonte për blerje votash.
Konflikti degradoi deri në përdorimin e armës, dhe si rezultat mbeti i vrarë militanti i LSI Gjoni ndërsa deputeti i PD Fufi dhe kushëriri i tij Kastriot Fufi mbetën të plagosur, ndërsa autori i ngjarjes ende dhe sot nuk është arrestuar.
Por edhe në përfundim të procesit të numërimit ët votave, Fufi nuk arriti të dalë deputet i së djathtës për qarkun e Lezhës, duke qenë i pesti në listën e PD. Ishte dorëheqja e Vasil Bicit, deputeti i fundit që doli na radhët e PD për Lezhën (nga 4 deputetë që fitoi Partia Demokratike në këtë qark) e cila bëri që mandati i deputetit t’i kalojë pikërisht kandidatit tjetër në radhë, e pikërisht Mëhill Fufit.
Në ato kohë, u hodhën dyshimet se Bici ishte tërhequr për shkak të presioneve të Fufit, por asgjë nuk u verifikua.
Duhet të vinte 23 dhjetori i vitit 2013, që Fufi të vihej sërish në vëmendje, kur persona të paidentifikuar i vjedhin deputetit një armë zjarri pistoletë, brenda në automjetin e tij, por që rezultoi që armën e kishte me leje.
Që nga ajo kohë Mëhill Fufi nuk është përmendur më deri ditën e sotme nga deklaratat e Doshit, ndërsa ende nuk ka një reagim zyrtar të deputetit të opozitës. Duhet nënvizuar edhe fakti që Fufi ka qenë edhe nënkryetar i Këshillit të Qarkut Lezhë, detyrë të cilën e dorëzoi pas marrjes së mandatit të deputetit të PD.