Siç ndodh rëndom kur arrihet një marrëveshje politike në Tiranë, i gjithë qëllimi është që të tregohet se ‘kush ia ngeci’ më shumë.
Në të vërtetë, të hënën në Tiranë pritet që të mbërrijë Eduard Kukan, si i dërguar nga grupi i të djathtëve në Parlamentin Europian.
Ai pritet që të nisë takimet me politikanët që në orët e para të mëngjesit.
Në tetë ai takohet me kreun e PD, Lulzim Basha.
Më pas do takojë kryeministrin Edi Rama dhe kryetarin e Kuvendit, Ilir Meta.
Takimet do i mbyllë përpara orës 13:00, kur Lulzim Basha do mbajë një fjalim përpara grupit parlamentar.
Aty pritet të shpallë vendimin e opozitës.
Por sa janë shanset që opozita të kthehet në Kuvend?
Dihet se problemi kryesor lidhet me dekriminalizimin e Kuvendit. Një ngërç i vogël është nëse në projektligjin për dekriminalizimin do përfshihen vetëm kandidatët për deputetë apo edhe të zgjedhurit e tjerë dhe nëpunësit e administratës publike.
Problemi i madh mbetet garancia ndërkombëtare për realizimin e marrëveshjes.
Eurodeputeti Knut Fleckenstein, i të majtëve në PE, tha se është optimist se do ketë një marrëveshje.
Por a do ketë firmë mbi një tekst të caktuar?
Demokratët janë të gatshëm që të kthehen vetëm për një ditë në Kuvend, duke thyer bojkotin, zgjidhur problemin e mandateve dhe shuar “zërat brenda” për kthimin në Kuvend.
Më pas edhe mund të rikthehen në bojkot.
Mazhoranca nga ana e saj do tregojë se i ezauroi të gjitha mundësitë dhe ashtu siç thonë disa eurodeputetë, tani nuk duhet të kërkojnë më ndihmën e askujt për të zgjidhur krizat.
Demokratët shpresojnë se një rezolutë në Kuvend për këtë çështje, do jetë një qasje e duhur për ta vënë marrëveshjen për vije.
Nuk dihet se si do rrjedhin ujërat deri të hënën, por koha ka provuar se shumë gjëra mund të vendosen në orën e fundit, sikundër mund të prishen minutat e fundit.
