Në Shqipëri parlamenti miratoi sot buxhetin për vitin 2015, ndërsa kryeministri Edi Rama hodhi poshtë akuzat se ndryshimet në taksa do të rëndojnë mbi ekonominë e qytetarëve.
Buxheti i cili ju nënshtrua më parë diskutimeve në komisionet parlamentare kaloi brenda pak orëve. Ai parashikon një rritje ekonomike prej 3 përqind, si dhe nisjen e uljes së borxhit publik. Partia demokratike, forca kryesore e opozitës, e ka kritikuar atë duke deklaruar se buxheti i ri do ta zhysë vendin në krizë, veçanërisht me rritjen e disa taksave. Por kryeministri Rama shpjegoi se taksat që rriten janë vetëm 3, ajo e qarkullimit e cila do të aplikohet mbi çmimin e karburanteve dhe rritjen nga 10 në 15 për qind të tatimit mbi interesat e depozitave dhe dividentin. Ai tha se këto taksa nuk prekin buxhetin e qytetarëve. Pak ditë më parë Misioni i FMN-së u shpreh se mbështet punën për reformat strukturore në vend.
