Kuvendi pritet të miratojë sot reformën e re territoriale ndonëse është kontestuar në disa zona të vendit.
Ashtu sikurse gjatë gjithë kësaj jave, edhe sot banorë të zonave të ndryshme kanë dalë në protestë.
Në Fier, banorët e Komunës Kuman kanë protestuar kundër ndarjes së re që e bashkon atë me Rroskovecin.
Në Tiranë, banorët e Paskuqanit protestuan kundër bashkimit me Kamzën dhe kërkuan të jenë Bashki më vete.
Po ashtu në protestë kanë dalë edhe banorët e tre komunave Gurrë, Xibër dhe Suç, të cilët kanë bllokuar rrugën Klos-Burrel.
Ndërsa banorët e Lurës kanë nënshkruar një peticion kundër kësaj reforme.
Gjatë këtyre ditëve protesta ka patur nëpër disa qytete të vendit si Korçë, Vlorë, Shkodër, Fier, etj.
Ndër ligjet e tjera parlamenti pritet të miratojë sot ligjet për KLD, Policinë e Shtetit dhe marrëveshjen me kompaninë CEZ.