Monumenti i Pavarësisë, i ngritur tek Parku Rinia në qendër të Tiranës me rastin e 100- vjetorit të Pavarëisë, ka rënë sërish pre e hajdutëve.
Këtë herë i janë vjedhur shtatë pllaka prej bronzi.
Policia ka nisur një procedim penal në gjendje të lirë për një punonjës të policisë bashkiake, i cili duhet të ruante monumentin.
Ndërkohë ekspertë të policisë po punojnë për të identifikuar dhe kapur autorët e grabitjes, ndërsa po kontrollohen edhe pikat e grumbullimit të skrapit, ku mund të jenë shitur pllakat e bronzit.
Ky monument u ndërtua i tëri me pllaka bronzi, me një kosto prej rreth 350 mijë euro, ku vetëm një nga pllakat e tij kushtoi 400 euro.
Monumenti historik u konceptua të kishte edhe deklaratën e Pavarësisë, së bashku me firmat e 40 delegatëve që ishin në Vlorë ditën e shpalljes së Pavarësisë.
Por qytetarët që e vizitojnë atë nuk kanë nguruar të shkruajnë emrat e tyre.
Madje shpesh janë parë qytetarë duke urinuar tek ky monument.
Së fundmi, monumenti ra pre e hajdutëve në mars të vitit të shkuar.