E ndërsa Ministria e Drejtësisë bën kallëzim penal në Prokurori, pasi në arkivën e saj janë zhdukur dosjet për tre gjyqtarë, KLD, me dyer të mbyllura, ‘kryqëzon’ pesë gjyqtarë të tjerë. Konstatimi i zhdukjes së dosjeve ka ardhur pas një inspektimi të bërë në vitet 2012-2013, ku ka rezultuar se mungojnë tri dosje për tre gjyqtarë. Dosjet e humbura, kanë të bëjnë me një inspektim për një gjyqtar nga Durrësi, një nga Korça dhe një nga Lezha. Por vetëm pak orë pas bërjes publike të këtij fakti Këshilli i Lartë i Drejtësisë i drejtuar nga Presidentit Bujar Nishani ka shkarkuar nga detyra, gjyqtarin e Shkodrës Albano Çepele dhe ka marrë masa ndëshkimore për katër gjyqtarë të tjerë, emrat e të cilëve i janë dërguar nga Ministria e Drejtësisë. Kështu, përveç shkarkimit të Çepeles, KLD-ja ka vendosur transferimin nga Gjykata e Tiranës në një gjykatë të nivelit më të ulët, për një periudhë dy vjeçare, gjyqtaren Elona Gjoka.
Po ashtu, KLD-ja i ka dhënë vërejtje me paralajmërim për pushim nga detyra për tre gjyqtarët e tjerë: Enkelejda Hoxha, Nazmije Pengili, Ëngjëllushe Tahiri, të tria në Gjykatën e Krujës. Për tri gjyqtaret e Krujës, Ministria e Drejtësisë e ndryshoi propozimin fillestar nga "Shkarkim nga detyra" me "Vërejtje me paralajmërim". Mbledhja e KLD-së u zhvillua me dyer të mbyllura në kushtet e mungesës së plotë të transparencës dhe krejt në kundërshtim me deklaratat e Nishanit për të zbardhur të vërtetat në sistemin e drejtësisë. KLD-së i është kërkuar nga Ministria e Drejtësisë të marrë masa ndaj pesë gjyqtarëve, të cilët rezultuan me shkelje në detyrën e tyre pas kontrollit që ndërmori Inspektoriati i KLD-së. Në adresë të këtyre gjyqtarëve ka pasur një mori ankesash që konsistonin në zvarritje të pajustifikueshme të proceseve gjyqësore, shkelje haptazi të ligjit procedurial dhe moszbatim të vendimeve unifikuese.