“E imja, ose e askujt tjetër”, i riu nga Kosova i hyn me armë natën nënës së dy fëmijëve në Shkodër - Bota Sot
“E imja, ose e askujt tjetër”, i riu nga Kosova i hyn me armë natën nënës së dy fëmijëve në Shkodër

Shkodra

E diel, 19 gusht 2018

“E imja, ose e askujt tjetër”, i riu nga Kosova i hyn me armë natën nënës së dy fëmijëve në Shkodër

Më: 30 korrik 2018 Në ora: 22:58

“E imja ose e askujt tjetër”, përfundon në pranga i riu nga Kosova, që udhëtoi 282 kg rrugë për t’i shprehur dashurinë gruas shkodrane. Prej gati një viti, ai ishte i fiksuar pas një gruaje 37- vjeçare në qytetin e Shkodrës dhe për këtë arsye kishte udhëtuar nga Vushtrria për t’i shprehur dashurinë.

I ndodhur përballë refuzimit të shkodranes, i riu kishte marrë dhe armë me vete për ta kërcënuar. Besnik Hyseni nuk reshte prej një viti, duke tentuar me të gjitha mënyrat që të bënte për vete 37-vjeçaren e divorcuar.

Pasi kjo e fundit e ka refuzuar çdo herë, 23- vjeçari nga Vushtrria ka thyer çdo pritshmëri të shtetases A.G., banuese në Shkodër, në dalje të lagjes “Rus” përgjatë rrugës që të çon te Komisariati i Policisë. Hyseni ka pritur deri pas mesnate dhe me një pistoletë në dorë, është futur brenda banesës ku jeton 37- vjeçarja.

Sapo është futur brenda oborrit të shtëpisë private, sipas burimeve policore, Besnik Hyseni i është drejtuar asaj me fjalët “ose je e imja, ose e askujt tjetër”. Gjatë gjithë kohës i është drejtuar me shprehje të tilla, duke e kërcënuar që të pranonte të krijonte lidhje intime me të.

E gjendur e pambrojtur dhe me armën në dorë, një pistoletë tip “Zastava” që mbante kosovari, 37-vjeçarja ka njoftuar menjëherë Policinë. Një patrullë ka qëlluar afër vendit të ngjarjes dhe ka shkuar me shpejtësi, duke bërë të mundur arrestimin e menjëhershëm në flagrancë të shtetasit Besnik Hyseni.

Edhe para policëve, në dëshminë e tij, 23-vjeçari nuk e ka fshehur dashurinë dhe fiksimin e tij të çmendur që ka për gruan shkodrane. Kjo e fundit ka treguar sesi prej një viti, ky shtetas e ka përndjekur me të gjitha format duke arritur deri në ekstrem, duke iu futur brenda shtëpisë me një armë në dorë.

Pas reagimit të shpejtë të Policisë, shtetasi Besnik Hyseni u arrestua, ndërsa në cilësinë e provës materiale iu gjet edhe pistoleta tip “Zastava”, që iu sekuestrua.

“Arrestimi i tij u bë pasi rreth orës 02:00 ka hyrë me një armë zjarri tip pistoletë në oborrin e banesës së shtetases A. G., e cila ka telefonuar Policinë dhe falë reagimit të shpejtë të saj, është arrestuar në flagrancë brenda banesës së shtetases së lartpërmendur, ku iu gjet edhe arma e zjarrit pistoletë tip ‘Zastava’, e cila u sekuestrua në cilësinë e provës materiale”, bëhet e ditur nga ana e Policisë.

Nga sa mësohet, Besnik Hyseni nuk e ka dhunuar dhe as kërcënuar 37-vjeçaren, por vetëm i ka thënë shprehje të tipi “ose je e imja, ose e askujt tjetër”. Ende nuk dihen rrethanat e njohjes së 23- vjeçarit nga Kosova me gruan nga Shkodra, por dyshohet se kjo ka ardhur përmes rrjeteve sociale.

37-vjeçarja A.G jeton vetëm me dy fëmijët e saj, ndërsa është e divorcuar. Besnik Hyseni është i dyshuar për veprat penale “Përndjekja” dhe “Prodhimi dhe mbajtja pa leje e armëve luftarake dhe e municionit”.

Komentet
comments powered by Disqus
Sot mund të lexoni Shfletoni kopertinat
Sondazh
test