Sot janë duke u zhvilluar homazhe për Ministrin e parë të Republikës së Kosovës, heroin e kombit, kolonel, Ahmet Krasniqi dhe deshmorin Qazim Jakupin.
Rivarrimi i Krasniqit dhe ftesa e publikuar në media, ku ai cilësohet vetëm si dëshmor, e jo si ish ministër ka ngjallur reagime të shumta në publik.
Analisti politik, Nexhat Haziri ka thënë se është një vrasje e dytë që po i bëhet kolonel Krasniqit dhe se është një tentim për të mohuar një pjesë të lavdishme të historisë së Kosovës.
“Është një vrasje e dytë që po i bëhet kolonel Ahmet Krasniqit për faktin se nga institucionet shtetërore nuk po njihet si ish Ministri i parë i mbrojtjes i Republikës së Kosovës. Ky është po ashtu një tentim për ta mohuar jo vetëm misionin kombëtar dhe meritat për lirinë e Kosovës të kolonel Ahmet Krasniqit, por edhe të një pjesë të lavdishme të historisë së Kosovës”, ka deklaruar Haziri për “Bota Sot”.
Për më tepër, ai ka shtuar se konsideromi i vetëm si dëshmor është e pakuptim, kjo është tendencioze nga ata që po tentojnë ta privatizojnë luftën e popullit të Kosovës.
“Ta konsiderosh vetëm si dëshmor një nga udhëheqësit institucional si ministër i mbrojtjes dhe komandantin e forcave ushtarake, kjo është një nonsens, por e kuptueshme dhe tendencioze nga ata që po tentojnë ta privatizojnë luftën e popullit të Kosovës për liri dhe pavarësi. Andaj kthimi i eshtrave të kolonel Ahmet krasniqit dhe rivarrimi i tij në Kosovë, në këtë formë është vetëm një përbuzje dhe mohim ndaj veprës dhe jetës së tij”, ka theksuar Haziri për “Bota sot”.
