Deputeti i Aleancës për Ardhmërinë e Kosovës, Muharrem Nitaj, në një prononcim për gazetën “Bota sot”, thotë se, është për keqardhje dalja e problemeve me listat e veteranëve, ndërsa thekson se të pashmangshme janë korrigjimet për këtë proces.
“Është për keqardhje pse ka dalë gjithë ky problem me listat e veteranëve. Është e pashmangshme që të bëhen korrigjimet ku ka pasur pasaktësi. Duhet të shihet se si i kanë zgjidhur këto çështje, të tjerët, për shembull Kroacia, e cila ka pasur probleme poashtu. Është poashtu e pafalshme që në listat e “mashtruesve”, janë gjendur edhe emra të dëshmuar”, thotë deputeti i AAK-së.
Tutje, Nitaj, shton se, nuk është dashur që prokuroria ta bëjë mediatike, pasi që, sipas tij, kjo çështje do duhej të kishte mbetur puro ligjore.
“Kjo është abuzim i skajshëm. Keq që prokuroria këtë çështje e ka bërë mediatike e do të duhet të kishte mbetur puro ligjore. Nuk e di nëse procesi duhet rikthehet nga fillimi, por duhet të zgjidhet. Kjo është në interesin e vetë veteranëve dhe të luftës së UÇK-së”, ka përfunduar deputeti i Aleancës për Ardhmërinë e Kosovës, Muharrem Nita, për “Bota sot”.
