Në kuadër të dialogut për normalizimin e raporteve mes dy shteteve, të mërkurën në Bruksel, mbahet takimi i radhës të presidentit të Kosovës Hashim Thaçi dhe atij të Serbisë, Aleksandër Vuçiq.
E, njohësi i çështjeve juridike-kushtetuese, Blerim Burjani, në një prononcim për “Bota sot”, shprehet skeptik rreth kësaj faze të dialogut me Serbinë.
Burjani thotë së ky dialog është vetëm rishikues i disa marrëveshjeve të mëhershme.
“Nuk pres ndonjë dialog me rezultate. Tema interesante janë në përgatitje e sipër, me tepër ky dialog është rishikues i disa marrëveshjeve të mëhershme, disa marrëveshje si ajo për energji e shumë tjera të pazbatueshme deri më tani”, thotë Burjani.
Sipas njohësit të çështjeve juridike-kushtetuese, Kosova ka një analfabet koordinator për dialog.
Tutje, ai shton duke thënë se produkt i të këqijave për vendin është dialogu i presidentit Thaçi, së bashku me qeverisjen “PAN”.
“Kosova nuk as ekip, ka një analfabet koordinator për dialog, kjo është e meta më e madhe. Vendi ka shumë probleme me dialog, për këtë, opozita ka të drejtë pse kritikon shumë. Më të vërtet, produkt i të këqijave është dialogu i Thaçit së bashku me qeverisjen “PAN”. Klani “PAN” i milionerëve vazhdon të qeverisë Kosovën me uzurpim të pasurive publik”, përfundoi njohësi i çështjeve juridike, Blerim Burjani, për “Bota sot”.