Eksperti i sigurisë së Kosovës, Fadil Kajtazi në një prononcim për “Bota sot”, tregon që serbët aktualisht kanë qasje të kundërta ndaj Kosovës.
Sipas tij, së fundi Qeveria e Serbisë dhe Aleksandër Vuçiq janë të interesuar për të arritur një marrëveshje përfundimtare me Kosovën.
“Qeveria e Serbisë dhe Vuçiq janë të interesuar për të hequr prej qafës problemin e Kosovës. Pra, për të bërë një zgjidhje, ata mendojnë në negociata me pas përfitime dhe ato përfitime lidhen me pjesën territoriale të veriut ose në ndryshimin e pozitës së serbëve në Kosovë”, thotë Kajtazi.
Sa i përket pozitës se serbëve në Kosovë, Kajtazi tregon se cilat qëllime synon t’i arrijë Beogradi.
“Kisha serbe me pas një pozicion tjetër më të avancuar, me qenë serbët prezent ndryshe në FSK, sikur në Bosnje, ku një brigadë është e serbëve, e një tjetër e boshnjakëve e një tjetër e kroatëve, diçka të ngjashme janë duke bërë përpjekje për të fituar edhe në Kosovë”, deklaron më tej ai.
Por, ai thotë se këto negociata nuk po i konvenon Kishës Serbe dhe qarqeve ruse në Serbi.
“Mirëpo këto negociata si duket nuk po i konvenojnë Kishës Serbe dhe atyre ruse. Kisha Ortodokse Serbe, Rusia dhe qarqe të ndryshme nacionaliste në Serbi e duan Kosovën, ashtu siç e kanë pasur të tërën. Ata mendojnë që duhet të prolongohet raportet serbe shqiptare sa të është e mundur. Ata mendojnë që në një të ardhme me pas ndryshime në politikën gjeostrategjike dhe në një moment të përshtatshëm Kosovën me ripushtuar edhe njëherë”, shtoi ai.
Ndryshe, Kosova dhe Serbia së shpejti pritet të fillojnë negociatat finale, ky synohet të arrihet një marrëveshje përfundimtare mes të dyja shteteve.
