Gjykata Kushtetuese sot ka vendosur që nuk ka shkelje në vendimin e Qeverisë për ngritjen e pagave, ku paga e Haradinajt do të jetë 2950 euro.
Ky vendim i Gjykatës vjen pas kërkesës së deputetes Albulena Haxhiu dhe 30 të tjerëve, në lidhje me vlerësimin e kushtetutshmërisë së Vendimit të Qeverisë së Republikës së Kosovës për rritje të pagave të të gjithë të punësuarve që paguhen nga buxheti i shtetit.
Gjykata Kushtetuese e deklaroi kërkesën të pranueshme për shqyrtim pasi konstatoi se çështjet e ngritura në kërkesë janë të kompleksitetit të tillë, sa që përcaktimi i tyre duhet të varet nga shqyrtimi i meritave dhe se kërkesa nuk mund të konsiderohet si qartazi e pabazuar brenda kuptimit të rregullit 36 (1) (d) të Rregullores.
Lëvizja Vetëvendosje vendimin e Gjykatës e konsideron shembull jo të mirë, ndërkaq partia Socialdemokrate nuk ka dashur të komentojë këtë vendim të Gjykatës nëse është i drejtë apo jo.
Deputetja nga radhët e PSD-së, Shqipe Pantina, ka thënë për “Bota sot” se vendimet e Gjykatës janë normë e interpretimit të ligjit për kushtetutën.
“Sa i përket vendimit të Gjykatës Kushtetuese, ne nuk e kemi parë aktvendimin që e ka dërguar Gjykata Kushtetuese, kështu që e kam vështirë ta komentojë a ka qenë vendim i drejtë apo jo. Megjithëse vendimet e Gjykatës Kushtetuese janë normë sa i përket interpretimit të ligjit për kushtetutën”, ka deklaruar Pantina.
Haradinaj që nga marrja e mandatit pothuajse puna e parë që ka bërë ka qenë rritja e pagave të në 23 nivele të ndryshme zyrtare duke filluar nga Kryeministri deri tek zyrtarëve për komunikim me publikun në qeveri.
Kryeministri Ramush Haradinaj përfitoi rritje në 2 mijë e 950 euro, pagë më të ulët se ai kanë zëvendëskryeministrat, në vlerë prej 2 mijë e 500 euro, ministrave u është caktuar 2 mijë euro paga mujore ndërkaq zëvendësministrave 1 mijë e 150 euro.
