Njohësi i çështjeve për Integrime Evropiane, Sami Blakaj ka thënë për “Bota sot” se ndonëse Uashingtoni zyrtar nuk është pjesë aktive e negociatave në Bruksel, procesi i dialogut ka qenë gjithmonë nën vëzhgimin e politikës amerikane.
“Megjithatë deklarimet e fundit të Ambasadorit amerikan Delaëie, se dialogu final Kosovë-Serbi do të fillojë shumë shpejt, na japin të kuptojmë se SHBA nuk do të rri duarkryq, por se do të jetë më aktive karshi fazës finale të bisedimeve Kosovë-Serbi”, ka deklaruar ai.
Për më tepër, ai ka shtuar se përfshirja e drejtpërdrejtë e SHBA-së në dialog do të ishte një garanci shtesë për arritjen e marrëveshjes finale ndërmjet Kosovës dhe Serbisë.
“Pjesëmarrja efektive e Uashingtonit në këtë fazë të dialogut është një lajm i mirë për Kosovën. Përfshirja e drejtpërdrejtë e SHBA-së në këtë proces do përshpejtonte dinamikën e punës së dialogut si dhe do të ishte një garanci shtesë për arritjen e marrëveshjes finale ndërmjet Kosovës dhe Serbisë”, ka theksuar Blakaj.
Për me tepër, ai ka shtuar se dëmet që mund t`i shkaktojë vendit në këtë fazë të dialogut, mund të jetë themelimit të Asociacionit të komunave serbe, por sipas tij, nuk duhet që t`i lejohet një gjë e tillë.
“Ndërsa lidhur me dëmet që mund ti vijnë Kosovës në këtë fazë të dialogut, mendoj se janë dëme që i referohen pikërisht themelimit të Asociacionit të komunave serbe. Këtu pala kosovare duhet të jetë e qartë dhe e pa kompromis, kur bëhet fjalë për formimin e asociacionit në bazë të aktgjykimit të Gjykatës Kushtetuese të Kosovës. Nuk duhet të lejohen në asnjë mënyrë që Asociacioni i komunave me shumicë serbe të formojë një nivel të tretë të qeverisjes në Kosovë duke cenuar kështu funksionimin unitar juridik të Kosovës”, ka përfunduar Blakaj për “Bota sot”.