Dialogu në mes të Kosovës dhe Serbisë ende nuk dihet se kur do të vazhdojë.
Takimi i fundit i cili nuk u mbajt, ishte paraparë për 26 mars, në ditën kur në Kosovë u arrestua drejtori i të ashtuquajturës Zyrës për Kosovën në Serbi, Marko Gjuriq, për shkak të hyrjes pa leje në Kosovë.
Për shkak të zhvillimeve takimi u anulua dhe tani nga Brukseli nuk ka ende asnjë informacion se kur do të jetë takimi i radhës në mes të delegacioneve të të dyja shteteve.
Këtë e ka konfirmuar për gazetën “Bota sot”, shefi i Delegacionit të Kosovës për bisedime me Serbinë, Avni Arifi, i cili ka thënë se ai ka kërkuar që takimi të mbahet me 2 maj, por që nuk ka marrë përgjigje nga Brukseli se kur mund të jetë ftesa për takimin e radhës.
“Nuk ka asnjë risi nga Brukseli. Qeveria e Kosovës, unë shefi i Delegacionit të Kosovës për bisedimet me Serbinë, kam kërkuar që ta kemi takimin me 2 maj, por as Brukseli e as Beogradi siç duket nuk kanë qenë të gatshëm që të takohen për marrëveshjen për energji apo menaxhimin e integruar të kufijve dhe as për njohjen e diplomave. Nuk ka asnjë informacion, asnjë përgjigje dhe as ndonjë indikator se kur mund të ftohemi në bisedime”, ka deklaruar Arifi për “Bota sot”.