Shefi i grupit parlamentar të LDK-së Avdullah Hoti ditë më parë kishte bërë të ditur se do t’i ftojnë të gjitha partitë politike në një tryezë të përbashkët për të diskutuar për rrëzimin e Qeverisë.
Se vendi do të shkojë në zgjedhje të parakohshme parlamentare, kjo nuk do dyshim.
Edhe burime të redaksisë së gazetës ‘’Bota sot’’ e kanë konfirmuar se në tryezën që do të mbahet të pranishme do të jenë përfaqësues të të gjitha subjekteve politike.
‘’Ideja është që pasi vendi është në krizë; institucionale e politike, por edhe në krizë të numrave atëherë zgjedhjet dhe kthimi i legjitimitetit janë opsioni i vetëm dhe LDK si partia më e madhe në vend e ka këtë obligim, prandaj edhe kemi tryezën’’, ka thënë ky burim.
Tutje, thekson se pavarësisht se disa parti nuk e kanë konfirmuar zyrtarisht ardhjen, por ato do të jenë prezentë në tryezë.
‘’Nuk e kanë konfirmuar zyrtarisht, mirëpo do të vijnë’’, përfundon burimi brenda LDK-së për gazetën ‘’Bota sot’’.