Politologu Gurakuq Kuqi ka thënë për “Bota sot” se LDK-ja është në pozitë ideale për të shkruar në zgjedhje, pasi që Lëvizja Vetëvendosje është përçarë dhe se koalicioni qeverisës është në pikën më të ulët të famës.
“LDK-ja tani është në pozitën ideale për të shkuar në zgjedhje, koalicioni qeverisës është në pikën më të ulët të famës, Lëvizja Vetëvendosje është e ndarë dhe e dëmtuar shumë, dhe e vetmja parti që paraqet një seriozitet politik për momentin është LDK-ja. Andaj, edhe kërkojnë zgjedhje sa më shpejtë që të mos i japin kohë të konsolidohet LVV-ja dhe PDK-ja, ku kjo e fundit edhe përkundër ndarjes së LVV-së nuk po arrin të konsolidohet me autoritetin e Kadri Veselit dhe të përfitoj nga momenti”, ka deklaruar ai për “Bota sot”.
Po ashtu, ai ka thënë se opozita çdo herë insiston për zgjedhje e sidomos kur është në pozicione të favorshme, por që LDK-ja nuk ka përkrahje as nga opozita tjetër për rrëzimin e qeverisë.
“Ndërsa argumente kundër qeverisë nuk po mbledh vetëm LDK-ja por edhe PDK-ja por kjo e fundit nuk ka mundësi të bëjë hapa të tillë për momentin pasi e di që nuk do dalë e para, gjithnjë duke vlerësuar rrethanat e tanishme. Por muajt në vazhdim mund të na sjellin befasi, si Gjykata Speciale, kalimi i asociacionit, dialogu me Serbinë, dhe një opinion që do i rritet zhgënjimi, për shkak të mos realizimit të pritjeve nga kalimi i demarkacionit. LDK-ja ka të drejtë të kërkojë zgjedhje, por prapë edhe nëse shkon në zgjedhje, për koalicion do t’i ketë të njëjtit, me gjasë prapë PDK-në, dhe jemi vetëm duke u sjellat në një cikël politikanësh të pa gatishmëri të tejkalojnë interesat personale dhe partiake për interesa shtetërore, pasi edhe mendësia e tyre politike nuk shtrihet më gjerë”, ka shpjeguar Kuqi për “Bota sot”.
Në fund, ai ka thënë se duhet një ndryshim i vazhdueshëm politikanësh për mendësi të re, gjë që nuk mund të ndodh brenda autoritetit real që ushtron një klasë oligarkike në Kosovë, me ligje demokratike.