Partia Demokratike e Kosovës, është rikthyer në Kuvendin Komunal të Skenderajt, pasi javën e kaluar kishte bllokuar punën e këtij Kuvendi, duke braktisur punën e tij.
PDK, përmes një komunikate për media, ka njoftuar se është rikthyer në Kuvend për shkaqe parimore.
E sipas njohësit të çështjeve politike, rikthimi i kësaj partie, është lojë për të sabotuar kryetarin e tanishëm të Skenderajt, Bekim Jashari.
Ai ka thënë për gazetën “Bota sot”, se PDK-së po i pengon puna e mirë e Jasharit, për shkak të frikës se “ai mund të rrënojë lidhjet e saj me krimin e instaluar në këtë komunë”.
“Rikthimi i PDK-së, ka ardhur pas braktisjes si lojë e asaj për të sabotuar Bekim Jasharin. Kjo ka të bëjë me faktin se PDK-së po i pengon puna e mirë e Bekimit, pasi kjo gjë do të rrënonte lidhjet e saj me krimin e instaluar edhe në komunë”, ka thënë Mehmeti.
Sipas tij, Jashari ka arsye për të pastruar komunën nga ata që ai i ka quajtur “oligarkë” të Sami Lushtakut. Ai ka kërkuar që Bekim Jashari të vazhdojë të çrrënjosë të keqen nga komuna e Skenderajt.
“Kjo gjë tregon fytyrën e vërtetë të kësaj partie, duke i dhënë edhe më shumë arsye Bekimit për të pastruar komunën nga oligarkët e Sami Lushtakut. PDK është munduar të sabotojë Bekimin, për ta futur në kurth dhe për ta korruptuar, për të pasur më lehtë zhvatjen e qytetarëve në favor të një grupacioni oligarkësh. Andaj, kryetari i ri, duhet të mos bie pre e provokimeve të Sami Lushtakut, por të vazhdojë të çrrënjos të keqen nga komuna”, është shprehur për “Bota sot”, Faton Mehmeti.
