Kryeministri i Malit të Zi, Dushko Markoviç, pritet që ta vizitojë Kosovën me datën 14 shkurt. Ndonëse ai kishte planifikuar që të qëndrojë në Prishtinë me datën 6 shkurt, megjithatë një vizitë e tillë u anulua. Vizita e kryeministrit malazez Markoviç bëhet me ftesë të kryeministrit Haradinaj, ndërkohë që pritet t’i hapë rrugë zgjidhjes së çështjes së demarkacionit me Malin e Zi.
Behët e ditur se marrëveshja për kufirin me Malin e Zi është kriteri numër një për liberalizim të vizave ndërkohë e njëjta duket fare larg që të ratifikohet në Kuvendin e Kosovës.
Në lidhje me atë se a do të jetë ardhja e Kryeministrit Malazez në Kosovë për afrim për zgjidhje të demarkacionit e kontestuar apo do të jetë vetëm një vizitë kurtuazie, analisti politik Fadil Lepaja ka thënë për “Bota sot” se ardhja e tij do ti jap drejtimin edhe projektligjit për marrëveshjen e demarkacionit, të dërguam në parlament, nga ana e qeverisë.
Sipas tij, ardhja e kryeministrit malazez Markoviç në këtë moment është i rëndësishëm, sidomos për procedurën e vendimmarrjes për liberalizimin e vizave.
Siasp tij, kjo tregon gatishmërinë edhe të palës malazeze për të gjetur një formulë, për të përmbyllur këtë proces të stërzgjatur, gjithsesi me fajin e palës së Kosovës dhe papërgjegjësisë së drejtuesve të institucioneve.
“Të shpresojmë se politika e Kosovës të ketë gjetur ndonjë formulë, e cila e nxjerr Kosovën nga zalli i gjallë ku e ka futur oligarkia e saj me interesat e ngushta të klaneve dhe elita egoiste dhe e korruptuar politike. Duhet pranuar se nuk do të jetë aspak e lehtë të gjendet kjo formulë, e cila është e pranueshme edhe për palën malazeze e cila nuk e ka aspak të lehtë të rishikojë një dokument i cili ka kaluar nëpër parlament, tashmë” është shprehur Lepaja.
