Për menaxheren e projekteve për bisedimet Kosovë-Serbi në Institutin KDI, Jeta Krasniqi, mundësia e vetme për transferimin e FSK-së në ushtri është përmes një konsensusi të përgjithshëm me gjithë pjesëtarët e komuniteteve, përfshirë edhe atë serb.
“Vlerësoj se lidershipi kosovar duhet të punoj në ndërtimin e konsensusit të brendshëm për çështje të rëndësisë shtetërore si është kjo e transformimit të FSK-së në ushtri, dhe ky transformim të ndodh në bashkërendim të plotë me miqtë tanë ndërkombëtar”, thotë Krasniqi për “Bota sot.
Sipas saj, lidershipi i Kosovës duhet të jetë i qartë që ushtria e ardhshme e Kosovës do ti shërbej interesave të gjithë qytetarëve të Kosovës dhe do të shërbej si një faktor paqeje dhe stabiliteti në rajon.
“Lidershipi kosovar duhet të angazhohet në një dialog të brendshëm me qytetarët e saj nga të gjitha komunitetet, përfshirë këtu komunitetit serb, për të garantuar integrimin e tyre të plotë në institucionet e Kosovës, duke mos lejuar instrumentalizimin e tyre nga ana e Serbisë, shtoi Krasniqi .
Ndryshe, formimi i ushtrisë ka filluar prej muajit mars të vitit 2014, kur në atë kohë, Qeveria e udhëhequr nga Hashim Thaçi miratoi Strategjinë për Shndërrimin e Forcave të Sigurisë së Kosovës në Forca të Armatosura.
Por, pas zgjedhjeve të qershorit po të njëjtit vit në Kuvendin e Kosovës erdhi një subjekt i ri politik, Lista Serbe që e zyrtarisht e mohon shtetësinë e Kosovës, dhe rrjedhimisht ajo po e pengon edhe themelimin e ushtrisë.
Kurse, ditë më parë zëvendëskryeministri, Dalibor Jevtiç në Qeverinë Haradinaj, në një vizitë në Ministrinë e Mbrojtjes së SHBA-ve – Pentagon, ka kundërshtuar themelimin e ushtrisë së Kosovës.
Jevtiç u ka thënë zyrtarëve të Pentagonit se themelimi i kësaj force ushtarake është kundër interesit të komunitetit serb.