Ditë më parë kryeparlamentari Kadri Veseli ka thënë se Ushtria e Kosovës, është vetëm çështje muajsh. Sipas tij, Kosova vetëm po pret dritën e gjelbërt nga SHBA-ja.
Derisa premtoi se ushtria do të formohet ai nuk përmendi edhe sfidat deri tek krijimi i saj, pasi dihet se kundërshtari më i madh i Ushtrisë së Kosovës, Lista Serbe është pjesë përbërëse e Qeverisë.
Të kontaktuar nga “Bota sot”, zyrtarë nga Qeveria nuk kanë dhënë ndonjë përgjigje se kur mund të krijohet ajo dhe sa sfiduese mund të jetë.
Selimi: S’ka ushtri nëse buxheti për FSK-në është sikurse vitin e kaluar
Deputeti i Lëvizjes Vetëvendosje, Rexhep Selimi, i cili është edhe zëvendëskryetar i komisionit për Siguri dhe Punë të Brendshme, ka thënë se edhe qëndrimi i Listës Serbe është qëndrim i Qeverisë së Kosovës, andaj, sipas tij, pritet të shihet javën e ardhshme nëse kjo qeveri do ta themelojë ushtrinë.
“Lista Serbe, si pjesë e koalicionit qeverisës, dhe qëndrimi i tyre është qëndrim i një pjese të qeverisë së Kosovës. Megjithatë, se a do ta themelojë Qeveria e Kosovës ushtrinë apo jo do ta mësojmë në javën e ardhshme kur ta shohim se sa buxhet kanë ndarë për këtë gjë”, ka thënë deputeti Selimi për “Bota sot”.
Ai ka theksuar se nëse buxheti për FSK-në është sikurse vitin e kaluar, atëherë nuk do të ndodhë themelimi i ushtrisë.
“Nëse përsëri do ta kemi buxhetin e FSK-së të njëjtë apo të përafërt me vitin e kaluar, atëherë edhe gënjeshtra do të jetë e njëjtë me atë të vitit të kaluar”, ka thënë ai.
Millaku: Qeveria e varur nga Lista serbe s’e ka në rend ushtrinë
Edhe anëtarja tjetër nga Komisioni i Sigurisë, deputetja e Vetëvendosjes, Drita Millaku ka thënë se themelimi i ushtrisë është shumë i vështirë, për shkak se në njërën anë ka pengesa nga komuniteti serb, ndërsa në anën tjetër nëse bëhet me ligjin aktual, mund të haset në problem tek moskonfirmimi nga ndërkombëtarët.
“Formimi i ushtrisë është thuaja i pamundur pa përkrahjen e komuniteteve pakicë e veçanërisht të komunitetit serb, i cili nuk ka disponim për këtë çështje. Sidoqoftë, formimi i ushtrisë mund të bëhet edhe në kuadër të ligjit aktual edhe pa përkrahjen e serbëve, por do të ketë probleme për afirmimin ndërkombëtar”, ka vlerësuar deputetja Millaku.
Sipas saj, kjo qeveri për shkak të varësisë së saj nga Lista serbe, as që do të diskutojë e lëre më të marrë veprime.
“Për formimin e ushtrisë duhet veprime konkrete e jo deklarata sa për elektorat. Jam e bindur se kjo qeveri nuk e ka as në rend dite diskutimin e ushtrisë”, ka thënë ajo.
Ndërkombëtarët mund të “zhbllokojnë” formimin e ushtrisë?
Ndërkaq, eksperti i sigurisë Hajrullah Tërnava, ka thënë se formimi i ushtrisë nga kjo qeveri, është i pamundur.
“Një qeveri si tani kjo e sotit me 61 deputetë, e kur të kihet parasysh se në këtë numër marrin pjesë edhe Lista Serbe prej 10 deputetëve, nuk ka shans formimi i ushtrisë së Kosovës. Kjo qeveri le që s’i ka 2/3 e deputetëve në parlament si kusht për miratimin kushtetues të formimit të ushtrisë, por kushti më i rëndë është ai i Listës Serbe, që vetëm kjo listë duhet ta votojë mbi 80% këtë ligj, që të jetë i plotëfuqishëm, e kur e dimë se pikërisht Lista Serbe është kundërshtuesja më e madhe për miratimin e Ligjit mbi formimin e ushtrisë”, ka vlerësuar Tërnava.
Ai ka theksuar tutje se vetë brishtësia e kësaj Qeverie, është sfidë dhe pengesë për formimin e ushtrisë.
“Në të ardhmen kur duhen të mbahen zgjedhje të reja dhe të formohet Qeveria e re, duhet t’a kemi parasysh faktin se në këtë qeveri duhen të jenë në numër të madh delegatët, të cilët do ta votojnë këtë ligj dhe shumë ligje tjera me mbi 2/3, e nëse edhe më tutje Lista Serbe paraqet probleme për formimin e ushtrisë, atëherë duhen të kërkohen rrugë të reja të ndryshimit të Kushtetutës tonë”, është shprehur ai.
Tërnava ka thënë se një rol të rëndësishëm e ka edhe faktori ndërkombëtar.
“Edhe faktori ndërkombëtar do të ketë rol të rëndësishëm për formimin e ushtrisë, sepse po e detyruan Serbinë që ta njoh pavarësinë e Kosovës, atëherë më nuk do të paraqitet Lista Serbe si pengesë për formimin e ushtrisë”, ka thënë eksperti i sigurisë, Hajrullah Tërnava.
