Në demokraci pushteti buron nga populli. Në parim ai ushtrohet nga përfaqësuesit e zgjedhur të popullit. Detyra e rëndësishme e tyre është bashkvendosja për kahun politik të shtetit, duke e përcaktuar atë përmes ligjeve dhe duke kontrolluar funksionimin e shtetit. Për këtë arsye, parlamenti quhet edhe pushtet ligjvënës .
Meqenëse parlamenti legjitimohet drejtpërdrejtë nga populli, nëpërmjet zgjedhjeve, ai ka një pozitë të lartë dhe vendosë në formimin e organeve udhëheqëse të vendit, përmes shumicës parlamentare. Kjo vlen në radhë të parë për qeverinë, e cila në sistemet parlamentare del nga parlamenti dhe përgjigjet para tij.
Deputetët e Republikës së Kosovës janë zgjedhur nga populli, që të punojnë për interes të popullit. Fatkeqësisht, pa fajin tonë, këtë të drejtë po na mohoni ju Zonja Brovina dhe klani juaj politik.
Është padrejtësi që agjendën tuaj politike, ta shndërroni në një bllokadë për institucionet e vendit, duke e përdhosur vullnetin e qytetarëve të cilët të sollën, edhe ty, në pozitën e Deputetes, për të iu shërbyer qytetarëve e jo që të bëheni vegël e partisë. Vendi ynë sot gjendet në një gjysmë anarki dhe nëse agjenda juaj politike vazhdon ta dominoj agjendën shtetërore, atëherë rrezikojmë shumë më shumë se kaq.
E nderuara Brovina, ani pse i gjithë pushteti del nga populli, ju me parime jo demokratike dhe arbitrare po e dhunoni vullnetin e lirë të popullit. Me apo pa dëshirën tuaj, Kosova më shumë se 6 muaj është pa institucione, ku të zgjedhurve të popullit sot po ju mohohet e drejta e fjalës, e veprimit dhe e komunikimit me qytetarë, ngase tempulli i demokracisë, vendi ku dalin debate dhe ide për ndërtimin e shtetit, vendi ku votohen dhe miratohen ligje dhe buxheti, vendi ku monitorohen punët e qeverisë është kapur dhe po komandohet nga ju Zonja Brovina dhe partia juaj.
Zonja Brovina, Parlamenti nuk është plenum i partisë suaj, të veproni ashtu siç jeni mësuar duke i shkaktuar Kosovës dëme të pa riparueshme. Kosova nuk është as shtet me parime të larta të demokracisë e as me shkallë të lartë të zhvillimit ekonomik siç janë shumica e vendeve të Evropës, andaj Kosova nuk e ka luksin që të vazhdoj me këtë bllokadë.
Zonja Brovina, reflektimi juaj në zhbllokimin e kësaj gjendje, do të ishte me interes për popullin e Kosovës, andaj, ju si deputetja më e vjetër e keni për obligim që të liroheni nga kornizat partiake dhe ta thirrni seancën parlamentare, nga ku duhet të zhvillohen debate që të vijmë deri te zgjidhja,duke i respektuar parimet demokratike.
Me Respekt
Pal Lekaj Deputet në Kuvendin e kosovës
