Edhe një fitore e Përfaqësueses së Kosovës, e cila mundi seleksionin e lojtarëve të NCAA – Athletes in Action, me rezultat 88:81. Në këtë ndeshje, ekipi ynë u paraqit me njëmbëdhjetë lojtarë vendorë, dhjetë prej të cilëve u aktivizuan në lojë. Përzgjedhësi Arben Krasniqi vendosi të mos e aktivizojë në lojë Dardan Berishën, i cili mori në goditje dhe lëndim të lehtë në ndeshjen ndaj kundërshtarit më të fortë të këtij turneu – universitetit Kansas State. Inkurajues është rikthimi i Mirza Ahmetbashiqit aktivizimi i të gjithë lojtarëve tjerë, nga të cilët lojën më të mirë e tregoi Leonard Mekaj, i cili shënoi 20 pikë, 4 kërcime, 4 asistime dhe 3 topa të vjedhur për vetëm njëzetë minuta lojë, ndërsa pikë të dyfishta shënuan edhe Granit Rugova (18), Drilon Hajrizi (12), Yll Kaçaniku (11) dhe Gazmend Sinani (10).