Mijëra flutura monarke, ngjyrë portokalli dhe të zezë, kanë filluar të mbërrijnë të shtunën në shtëpinë e tyre dimërore në qendër të Meksikës, në migrimin e përvitshëm të tyre.
Migrimi masiv prej 4800 km gjatësi i fluturave monarke, në Amerikën e Veriut është një nga ngjarjet më fantastike në botën e insekteve. Janë me miliona ekzemplarë, që kryejnë udhëtimin e gjatë nga Kanadaja në Meksikë apo në brigjet e Kalifornisë, për çdo vjeshtë.
Numri i fluturave emigruese ka rënë ndjeshëm në vitet e fundit. Ekspertët thonë se, ndërsa rreth një miliard flutura monarke migruan në Meksikë në 1996-n, ky numër ishte 35 milionë vitin e shkuar.
Ato kërcënohen nga humbja e habitateve, si pasojë e aktiviteteve njerëzore, pesticideve dhe ndryshimeve klimatike. Shkencëtarët në Meksikë kanë punuar për një fertilizator organik, që përhapet në pyjet e vendit, me qëllim mbrojtjen e fluturave.
Fluturat tërheqin vizitorë nga e gjithë bota. Fluturat monarke kanë krahë të ngjyer me portokalli dhe të zezë, me pika të bardha në to. Gjatësia e krahëve të tyre shkon deri në 10 cm dhe trupat i kanë të zinj. Pavarësisht se është një specie, që kryesisht vjen nga Amerika e Veriut, mund të gjenden koloni fluturash monarke edhe në Amerikën Qendrore, atë Jugore etj. Kolonitë jashtë Amerikës Veriore nuk migrojnë.
