Ka filluar pastrimi i lumit Trepça që derdhet në Sitnicë. Ky lum është pastruar disa herë, mirëpo, qytetarët e pakujdesshëm po hedhin mbeturina në të.
Kryetari i komunës, Agim Bahtiri ka inspektuar edhe të dielën punët në pastrimin e lumit “Trepça”, që derdhet në Sitnicë. Ai në vendin ku po bëhej pastrimi ka takuar edhe pronarin e Kompanisë “Bajraktari”, që këtë punë po e bënë me kërkesë të kryetarit, por për të cilën ka thënë se nuk do të marrë kurrfarë kompensimi.
“Po ndjehem mirë që jam në gjendje të jap kontributin tim modest falas për të ndihmuar komunën e Mitrovicës, por para së gjithash qytetarët e kësaj lagjeje dhe punëtorët që punojnë në institucionet dhe kompanitë afër lumit. Punët po shkojnë mirë dhe pa asnjë problem. Siç po shihet pas largimit të mbeturinave të shumta që pothuaj se në disa segmente edhe e kishin bllokuar rrjedhin e ujin, lumi po merr një pamje krejt ndryshe, të pëlqyeshme nga banorët e këtushëm dhe qytetarët që kalojnë pranë tij. Përveç kësaj, me pastrimin e lumit, evitohet edhe mundësia e përhapjes së ndonjë epidemi eventuale”, tha ndër të tjera Bajrakatari.
Kryetari i komunës, Agim Bahtiri, pasi falënderoj Bajrakatarin për gatishmërinë e tij për pastruar lumin pa kurrfarë kompensimi, tha se puna po bëhet jashtëzakonisht mirë dhe se është kënaqësi të shikosh lumin e pastruar.
“Ky lum që prej kur unë kam ardhur në krye të komunës, është pastruar disa herë. Mirëpo, qytetarët nuk po janë të ndërgjegjshëm dhe të kujdesshëm sa duhet, sepse mbeturinat po i hedhin në të, gjë që është e pa pranueshme. Ne jemi përkujdesur që të vendosim numrin e mjaftueshëm të kontejnerëve në vendet e caktuara, pastaj kemi shpërnda edhe kontejner nëpër familje, mirëpo, hedhja e mbeturinave në lum ka vazhduar dhe kjo nuk është mirë dhe nuk do të duhej të ndodhë”, tha ai.
Kyetari Bahtiri në vazhdim apeloi tek banorët e lagjes dhe qytetarët, që të ndërpresin përfundimisht praktikën e ndotjes së lumit, duke i hedhur mbeturinat në të.
“Do të marrim masa rigoroze për t’i identifikuar të gjithë ata që e ndotin lumin dhe për të marrë masa ligjore ndaj tyre. Prandaj, edhe njëherë i ftoj qytetarët që të kenë kujdes dhe të vetëdijesohen për mirëmbajtjen e lumit dhe ambientit në të cilin jetojnë, sepse kjo është për të mirën e tyre, e sidomos fëmijëve. Nëse kanë nevojë për kontejnerë të tjerë, atëherë le të paraqiten në komunës dhe ne do ua sigurojmë, por hedhja e mbeturinave në lum është e papranueshme dhe e dënueshme”, tha ndër të tjera kryetari Bahtiri.
Përgjatë lumit Trepça, pjesa ku po pastrohet jetojnë banorët e lagjes “2 Korriku” dhe është i vendosur Universiteti i Mitrovicës “Isa Boletini”, si dhe disa pjesë të Kombinatit “Trepça”.
