Marrëveshja e demarkacionit me Malin e Zi, e cila ende nuk është sjellë për ratifikim në kuvend, ka sjellë në pah mos fuqinë e koalicionit qeverisës LDK-PDK. Kundërshtimit të kësaj marrëveshje nga ana e deputeteve të partive opozitare, kohëve të fundit i janë bashkuar edhe deputetët nga pozita.
Rasti i fundit është i deputetes së LDK-së, Beda Gaxherri, e cila ka thënë se demarkacioni më Malin e Zi duhet të rishikohet, dhe qeveria mos të ngutët në ratifikimin e tij.
Po ashtu ditë më parë, kemi dëgjuar edhe deputetët e PDK-së, siç është rasti i Adem Grabovcit, Xhavit Halitit e Nait Hasanit, të cilët kanë bërë thirrje që të rishikohet marrëveshja me Malin e Zi, duke shtuar dyshimet se PDK nuk do ta votojë këtë marrëveshje nëse ajo sillet në Kuvend për ratifikim.
Por analistët këtë e shohin si një lojë të kryetarit të PDK-së, dhe njëherit edhe kryetar i PDK-së, Kadri Veseli, cili këtë zvarritje po e shfrytëzon për arsye te veta personale, në mënyrë që të arrijë qëllimet e tij.
Faik Krasniqi, analist dhe publicist thekson se Kadri Veseli ka qëllime të mëdha në politike dhe jo rastësisht nuk ka ardhur në postin e kryetarit të PDK-së zyrtarisht, pasi sipas tij ai ka qenë një kryeatr nën hije.
“Kadri Veseli ka ambicie të mëdha në politikë. Jorastësisht nuk erdhi fillimisht drejt e në postin e zëvendëskryetarit të PDK-së, post ky që nuk ka ekzistuar ndonjëherë në asnjë parti, pastaj të Kryetarit të Kuvendit dhe jo më shumë se një muaj zyrtarisht edhe kryetar I PDK-së, edhe pse ai ka qenë gjithmonë kryetar nën hije i saj. Tash ai ka në dorë dy armë shumë të fuqishme, për ta prishur koalicionin me LDK-në dhe Kosovën ta dërgojë në zgjedhje të jashtëzakonshme, Demarkacionin me Malin e Zi, dhe Asociacionin e komunave me shumicë serbe”, ka thënë Krasniqi. për gazetën Bota sot.
Sipas tij, në rast se vjen tek zgjedhjet parakohshme humbësja më e madhe do të jetë Lidhja Demokratike e Kosovës.
“Padyshim se humbësja më e madhe do të jetë LDK-ja kurdo që të mbahen zgjedhjet, sepse elektorati i saj kurrë nuk do t'ia fal tradhëtinë që ua bëri, duke shkuar në prehrin e PDK-së dhe SHIK-ut. Besoj që do të jetë mësim i mirë ky për LDK-në, po jo vetëm për të, por për të gjitha partitë që lakmojnë pushtetin dhe bëjnë koalicion edhe me ata që deri dje i kritikuan për çdo të keqe që i ka ndodhur Kosovës, që nga krimet ekonomike e deri tek vrasjet me motive politike”, theskon Krasniqi.
Sipas tij zgjedhjet e parakohshme mund të ndodhin nëse Qeveria tenton që marrëveshjen për Demarkacion ta ratifikojë në Kuvend, dhe ratifikimi do dështonte të votohej.
“Qeveria po t'i kishte numrat e mjaftueshme për ratifikimin e demarkacionit me Malin e Zi, këtë do ta kishte shumë muaj më parë. Por. ata nuk i kanë votat e mjaftueshme, meqë duhen votat e 2/3 të deputetëve për ratifikimin e marrëveshjes së Demarkacionit. Sepse edhe deputetët e koalicionit të shumicës, PDK-së dhe LDK-së, edhe pse kanë heshtut deri më tash, pavarësisht se e kanë ditur që Kosova me këtë marrëveshje humb mbi 8200 hektarë, do të votojnë kundër ratifikimit të Demarkacionit, nëse Qeveria e dërgon për ratifikim në Kuvend. Dhe dështimi i ratifikimit automatikisht Kosovën do ta dërgonte drejt zgjedhjeve të jashtëzakonshme”.
Po ashtu edhe analisti Gazmend Islami, për gazetën Bota sot, thekson se demarkacioni me Malin e Zi, Kadri Veseli është duke e shfrytëzuar për qëllime personale të tij, në mënyrë që të arrij që vendin ta dërgojë në zgjedhje.
“Çështja e demarkacionit me kufirin me malin e zi është vërtetuar dhe mund te vërtetohet topografike që është një shkelje e rëndë kushtetuese sepse me vetëdije ose me pëlqimin e dikujt i është dhënë Malit të Zi mbi 8 mijë hektarë tokë, prandaj tash shihet se kjo është një shkelje drastike e kushtetutës dhe rëndit kushtetues, kjo mund të shihet si tradhti ndaj vendit. Ketë lojë politike tash është duke e bërë Kadri Veseli për interesa të veta, pra e mbanë pezull çështjen e demarkacionit, dhe në momente te caktuara, sepse çështja e demarkacionit nuk mund te kaloj pasi kemi deputetë brenda PDK-së, dikund 10 të cilët nuk e votojnë, por kemi edhe brenda LDK-së, siç është rasti i deputetit Shpejtim Bulliqi, cili nuk e voton, por ka edhe shumë te tjerë që nuk do ta votojnë”, thekson Islami.
Sipas Islamit, kjo mundë të jetë një mollë sherri mes LDK-së dhe PDK-së, gjë që lideri i PDK-së është duke e shfrytëzuar haspirën që i është dhënë.
“Kjo mund të jetë thyerja e parë apo mollë sherri në mes koalicionit. Momentin që vija e Kadri Veselit e shesh që mund t’i fitoj zgjedhjet e parakohshme të cilat do të vijnë shumë shpejt, atëherë do ta shfrytëzoj këtë kartë, pra çështjen e demarkacionit, atëherë do ta bej prishjen e koalicionit me LDK-në”, thotë Islami.
Ndërsa analisti dhe publicisti Skender Zogaj, thotë se marrëveshja e demarkacionit është bërë mollë sherri jo për çështje të problemit konkret që ka të bëjë me hapësirën territoriale të përfolur, por për faktin se opozitës i duhet një pretekst për të kontestuar pozitën aktuale, së cilës opozita me të drejtë, tenton t'ia rrëmbej pushtetin.
“Marrëveshja e demarkacionit është bërë mollë sherri jo për çështje të problemit konkret që ka të bëjë me hapësirën territoriale të përfolur, por për faktin se opozitës i duhet një pretekst për të kontestuar pozitën aktuale, së cilës opozita me të drejtë, tenton t'ia rrëmbej pushtetin sepse, ky është synimi plotësisht i drejtë i opozitës. Pra, demarkacioni është një çështje që është problematizuar për qëllime politike dhe aspak për qëllime patriotike, siç pretendon të thotë opozita, e veçmas VV, e cila po të ishte në pushtet do të ishte edhe njëqind herë më dorëlirë se pozita dhe, do 'ia dhuronte me kënaqësi edhe krejt Pejën e Mitrovicën shteteve fqinje”, thotë Zogaj.
Më tej sipas Zogajt çështja e Demarkacionit është tepër e rëndësishme dhe duhet që pozita ta zgjidh me kujdes dhe përgjegjësi historike, dhe pa asnjë interes partiak.
“Nëse marrëveshja kushtëzohet nga interesat partiake, si nga ana e PDK-s ashtu edhe e LDK-s, që të dyja do të dalin tepër të humbura dhe të koritura keq. Ratifikimi i marrëveshja është çështje e Parlamentit, ku deputetët që e konsiderojnë veten shqiptar duhet të gjykojnë mirë interesin e shtetit të Kosovës dhe të vendosin përmes votës së tyre. "PO-ja" ose "JO-ja" e tyre e gabuar është tradhti! Është për keqardhje niveli i disa deputetëve që, janë kumbarët e marrëveshjes, që kanë qenë përkrahës të zëshëm në fillim dhe tash po i hanë fjalët e tyre. Kjo është për keqardhje dhe flet për nivelin injorant të tyre, që kthehen kah frynë era dhe për një llokum e harrojnë misionin e tyre, harrojnë popull, zot e atdhe. Sidomos janë për tu vajtuar disa zëra të LDK-s, të cilët po e vërtetojnë dyshimin e dukurshëm se, brenda LDK-s janë të deleguar me detyra speciale. Kiropterët po mendojnë se u ka ardhur çasti të kafshojnë por e kanë keq, sepse kafshimi në këto kohë të liga është me pasoja edhe për ta”, theskon në fund për gazetën Bota sot, analisti Skender Zogaj.