Festivali i 54-t i Këngës në Radio Televizionin Shqiptar, tashmë ka kaluar fazat e tij, për të mbërritur tek sfida e 30 këngëtarëve në skenën e fundvitit. Vetëm pak javë para festivalit është dorëhequr Edea Demaliaj, arsyet e të cilës nuk i bën të ditura. Sipas formulës së spektaklit e para në listpritje në këtë edicion ka qenë këngëtarja Orgesa Zaimi e cila garon për herë të parë për këtë trofe.
E kontaktuar nga “Shqiptarja.Com”, Orgesa Zaimi na tregon se është bërë pjesë e këtij festivali pasi ka kaluar të gjitha fazat dhe formulat që janë ndjekur ndër vite nga të gjithë drejtuesit e Festivalit të RTSH-së. “Unë nuk kam zëvendësuar askënd, jam bërë pjesë e këtij edicioni sipas të gjithë procedurave që ka ndjekur ky festival. Ka qenë pikërisht Drejtori i Festivalit, Martin Leka i cili më ka kontaktuar për të më thënë se kënga ime është e para në listpritje, duke u bazuar në të gjithë rregullat e këtij Festivali”, tregon Orgesa.
E lumtur që do të jetë pjesë e kësaj gare, Orgesa thotë se konkurron për herë të parë në Festivalin e RTSH-së, këngë e cila ka kaluar në të gjitha fazat që ky festival ka. Kujtojmë se, Orgesa Zaimi një zë tashmë të njohur prej vitesh në muzikën e rrymës së re në Shqipëri, ajo ka sjellë larmishmëri dhe ngjyra në këngë.
Festivali i këngës në RTSH do të mbahet në datat 25,26 dhe 27 dhjetor. Në dy netët e para do të degjohen nga 15 këngë, prej të cilave do të përzgjidhen 9 këngë për çdo natë. Në natën finale do të ketë 18 këngë. Organizatorët e festivalit kanë theksuar se në këtë ngjarje do të përfaqësohen të gjithë brezave të artistëve si kompozitorë, poetë, këngëtar, etj. Gjithashtu do të ketë dhe një larmi të madhe për sa i përket rrymave të muzikës së lehtë.
Fituesi i Festivalit të 54-t të Këngës në Radio Televizionin Shqiptar, do të marrë pjesë në Festivalin Europian të Këngës. Ky festival mbahet më 10,12 dhe 14 maj të vitit të ardhshëm në Stokholm të Suedisë.
