Çfarë ndodh kur një Presidenti, dhe aq më tepër atij të Shteteve të Bashkuara të Amerikës, i refuzohet karta e kreditit? Epo në të tilla raste, paguan bashkëshortja. Kjo ka ndodhur në një restorant, ku Presidenti i SHBA-ve Barack Onama po darkonte me bashkëshorten e tij, Michelle.
Për kamerieren nuk ishin aspak e lehtë, për t’i thënë Presidentit të saj se karta e tij nuk funksionon. Nuk ndodh çdo ditë që të kesh Presidentin dhe Zonjën e Parë, në restorant për të darkuar. Por surpriza ishte sidomos në momentin e pagesës së llogarisë, kur pajisja refuzoi kartën e kreditit të Presidentit.
“Zoti President, më falni po karta juaj e krediti nuk funksionon! Duhet të paguani llogarinë në një mënyrë tjetër”, i është drejtuar kamerierja e restorantit Obamës.
Fatmirësisht ishte Michelle ajo që pagoi llogarinë me kartën e saj. Obama e tregoi këtë ngjarje në formën e një anekdote, sipas së cilës edhe presidentët, që marrin strehim dhe transport falas, mund të preken nga sistemi financiar.
Një muaj më parë, gjatë Asamblesë së Përgjithshme të OKB-së, ai nënshkroi një urdhër ekzekutiv presidencial, për të rritur nivelin e sigurisë së transaksioneve elektronike dhe mbrojtjen e të dhënave personale.
“Mendova se në restorant kishim të bënim me ndonjë lloj mashtrimi, dhe se edhe unë mund të prekesha nga ky mashtrim”, tha Obama.
Vjedhja e identitetit është një problem mjaft shqetësues në SHBA. Vitin e kaluar, sipas vlerësimeve rreth 100 milionë persona janë prekur nga ky fenomen, gjatë kohës që ata kanë blerë produkte në dyqanet amerikane.
