Vjollca Buqaj gjithmonë i qëndroj besnike zhanrit të muzikës popullore, ashtu siç i qëndroj besnike edhe adhuruesve të muzikës së saj, duke u kujdesur që shumë herë të sjellë këngë të reja. Ajo vitin e ardhshëm për adhuruesit e saj do të sjellë një CD, si përmbledhje e këngëve të saj.
“Bota sot”: Vjollca cilat janë planet e juaja në muzikë për këtë vit?
Vjollca Buqaj: Këtë vit jam duke realizuar një këngë të re së bashku me videoklip dhe shpresoj që në shtator do të lansohet.
“Bota sot”: A mendoni që do të mbijetojë muzikë popullore, ku dihet që para shumë viteve këngëtarët popullor kanë dominuar në skenë?
Vjollca Buqaj: Patjetër se muzika popullore gjithmonë është dhe do të jetë aktuale ku e dimë që as një mbrëmje muzikore, aheng familjar apo evenimente të ndryshme nuk bëhet pa muzikë popullore.
“Bota sot”: Ju kanë ecur planet ashtu si i keni planifikuar edhe vet ju?
Vjollca Buqaj: Deri më tani po, edhe pse çdo herë kërkoj më tepër nga vetja.
“Bota sot”: Ku e ndjeni veten më mirë, në dasma apo në mbrëmje të ndryshme?
Vjollca Buqaj: Për mua skena është e njëjtë sepse në të dy eventet kërkohet përgjegjësi, dhe aty ku kam pranë publikun çdo herë ndihem mirë.
“Bota sot”: A besoni që do të jeni gjeneratat e fundit sa i përket prodhimit të muzikës popullore?
Vjollca Buqaj: Absolutisht jo, sepse edhe ata këngëtarë të rinj që dalin nga festivale të ndryshme i shohim shpesh herë në mbrëmjë të ndryshme duke kënduar muzikë popullore.
“Bota sot”: A keni qenë pjesë e ndonjë shoqërie kulturore apo ndonjë ansambli?
Vjollca Buqaj: Po fillimisht kam qenë anëtare e SH.K.A “Rilindja” pastaj duke vazhduar me ansamblin folklorik “Azem Bejta” në Prishtinë.
“Bota sot”: Cilën periudhë e vlerësoni si më të suksesshëm për ju?
Vjollca Buqaj: Fillimi i karrierës sime si nxënëse e shkollës fillore ka qenë jashtëzakonisht i suksesshëm sepse në atë periudhë u pranova në audicionin e RTP-së ku permanent incizoja këngë të ndryshme të cilat emitoheshin çdo herë dhe kjo periudhë më bën të ndihem edhe sot krenare.
“Bota sot”: A ka nevojë të modernizohet mënyra e interpretimit?
Vjollca Buqaj: Unë mendoj që çdo interpretimi duhet me i dhënë shpirt në mënyrë që ai emocion të përcillet edhe të artdashësit.
“Bota sot”: Ju sigurisht jeni pjesë e ndonjë evenimenti muzikor. A shkoni atje në mënyrë të pavarur apo me përbërje të ndonjë orkestre folklorike a popullore?
Varësisht nga kërkesat, nëse kërkohet që të jem bashkë me orkestër atëherë kam bashkëpunëtorët me të cilët punoj kohë të gjatë por shkoj edhe si e pavarur.
“Bota sot”: A e keni edituar ende CD-në në 2014?
Vjollca Buqaj: Sa i përket CD-së vitin e ardhshëm mendoj t’i përmbledh të gjitha këngët e fundit në një CD.
“Bota sot”: Cilin vend e zë familja në listën tuaj të planeve ditore?
Vjollca Buqaj: Normalisht që prioritet gjithmonë e kam familjen sepse ata janë motivi i jetës sime mirëpo nuk e lë anash asnjëherë profesionin.
“Bota sot”: Pse duhet dashur muzika popullore?
Vjollca Buqaj: Unë personalisht e këndoj muzikën popullore sepse e dua, dhe ndihem mirë gjithmonë kur interpretoj.
“Bota sot”: Ç’të mira të ka sjellë muzika në jetë?
Vjollca Buqaj: Shpirtërisht kur këndoj ndihem shumë mirë, dhe në momentin kur marr mikrofonin në dorë të gjitha brengat në atë moment i harroj dhe duartrokitjet e publikut janë motivi më i fortë që më shtyn të punoj edhe më tepër.
“Bota sot”: Cilat plane i keni për të ardhmen?
Vjollca Buqaj: Planet për të ardhmen i ceka pak më lart dmth përmbledhja e këngëve në një album.
“Bota sot”: Diçka për fund nëse keni për të shtuar diëka për gazetën “Bota sot”, nëse nuk ju kemi pyetur?
Vjollca Buqaj: Fillimisht ju falënderoj juve që ma mundësuat këtë intervistë dhe të jem sa më pranë publikut poashtu të gjithë lexuesve të gazetës “Bota Sot” ju uroj të gjitha të mirat.
