Me dëgjimin e një pjese të 900 “bombave”, sot në Gjykatën Penale në Shkup ka vazhduar gjykimi në lëndën “Titanik”, ku në bankën e të akuzuarve janë disa ish-funksionarë.
Gjykimin e udhëheq Osman Shabani, ndërsa në seancë janë pranishëm gjithë të akuzuarit, si dhe përfaqësuesja e aktakuzës nga PSP, Lile Stefanovska.
Në një nga “bombat” e prezantuara sot, dëgjohet biseda para dy ditëve të zgjedhjeve të vitit 2011, mes kryetarit aktual të KSHZ-së Oliver Derkoski dhe ish-ministrit Mile Janakieski.
Si kryetar i atëhershëm i “Hekurudhave të Maqedonisë” Oliver Derkoski, merr instruksione nga Mile Janakieski për angazhimin e anëtarëve të partisë për ngjitjen e posterave të partisë.
“Tonët deri pijnë kafe në orën 07:00, deri në 09:00 do të votojnë. Deri 10:00 do të votojnë shokët dhe familjarët, deri 12:00 gjithë të punësuarit, ndërsa më pas të papërcaktuarit”, dëgjohet t’i ketë thënë Janakieski Derkoskit.
Ai gjithashtu i thotë Derkoskit se i duhet listë për aktivitetet konkrete për ditën e zgjedhjeve. Për lëndën “Titanik” PSP ka dorëzuar 5910 dëshmi materiale dhe ka propozuar 191 dëshmitarë.
